Devendra Fadnavis Pune Rally : CM फडणवीसांचा अनोखा 'टॉक शो', जोडीला दोन सभाही; पुण्यात भाजपची जय्यत तयारी

Pune Municipal Corporation Election : राज्यात महापालिका निवडणुकांसाठी सर्वच राजकीय पक्षांनी कंबर कसली आहे. उमेदवारी अर्ज मागे घेण्याची मुदत संपल्यानंतर खऱ्या अर्थाने उमेदवार आणि नेत्यांचा कस लागणार आहे. प्रचाराच्या माध्यमातून उमेदवारांना मतदारांपर्यंत पोहोचावे लागणार आहे. पुण्यामध्येही भाजपने जय्यत तयारी केली असून मुख्यमंत्री देवेंद्र फडणवीस संपूर्ण शहर पिंजून काढणार आहेत.

पुणे महापालिकेमध्ये मागीलवेळी भाजपचे ९९ उमेदवार निवडून आले होते. आता नगरसेवकांचा आकडा शंभरीपार नेत इतिहास घडविण्याचा भाजपचा प्रयत्न असेल. त्यासाठी शहरात सत्ता काबीज केल्यानंतर केलेली विकासकामे, राज्य तसेच केंद्र सरकारच्या माध्यमातून केलेल्या कामांचा लेखाजोखा मतदारांपर्यंत पोहोचविण्यासाठी भाजपने तयारी केली आहे.

भाजपकडून पुणे शहरातील प्रचाराबाबतची रणनीती तयार करण्यात आली आहे. येत्या दोन दिवसांत भाजपकडून पुणे महानगरपालिकेचा जाहीरनामा प्रसिध्द केला जाणार आहे. पुणेकरांना या जाहीरनाम्यातून काय मिळणार, याबाबत उत्सुकता वाढली आहे. प्रचारासाठीही स्थानिक नेत्यांसह मुख्यमंत्री फडणवीस तसेच राज्यस्तरावरील अनेक नेते मैदानात उतरणार आहे.

मुख्यमंत्री फडणवीस यांच्या पुणे शहरात दोन सभा होणार आहेत. त्याचप्रमाणे मुख्यमंत्र्यांच्या उपस्थितीत अनोखा ‘टॉक शो’ही आयोजित केला जाणार आहे. यामाध्यमातून ते पुण्यातील विविध घटकांशी संवाद साधतील. फडणवीस यांच्या सभा तसेच ‘टॉक शो’ला पुणेकरांचा उत्स्फुर्त प्रतिसाद मिळेल, अशी भाजपच्या पदाधिकाऱ्यांना अपेक्षा आहे. त्यादृष्टीने तयारी केली जात आहे.

मुख्यमंत्री फडणवीस यांच्यासह भाजपचे स्थानिक व राज्यस्तरावरील नेते प्रचाराचा धुराळा उडवून देणार आहेत. राज्यात एकाचवेळी २९ महापालिकांमध्ये निवडणुका होणार असल्याने त्यादृष्टीने त्यांच्या प्रचारसभा, रोड शो, संवाद कार्यक्रमांचे आदींचे नियोजन केले जात आहे. पुण्यात पुन्हा एकदा सत्ता आणण्यासाठी कार्यकर्ते, पदाधिकारी नेते जोमाने कामाला लागल्याचे चित्र आहे.