PMC Election : पुण्यात मुरलीअण्णांच्या एकाही जवळच्या कार्यकर्त्याला तिकीट नाही, एका उमेदवाराचा भरलेला अर्जही काढून घेतला : इतर मातब्बरांनाही घराणेशाहीच्या नियमाचा फटका

PMC Election : पुणे महापालिकेसाठी आज उमेदवारी अर्ज भरण्याचा शेवटचा दिवस होता. यानिमित्त उमेदवारी कोणाला मिळणार याबाबत सकाळपासून बराच गोंधळ पाहायला मिळाला. सर्वच राजकीय पक्षांबाबत ही गोष्ट पाहायला मिळाली. पुण्यात भाजपनं शिवसेनेसोबत युती केलेली असली तरी सर्वाधिक जागांवर भाजपनं आपले उमेदवार उभे केले आहेत. पण यंदा पक्षातील अनेक दिग्गजांच्या जवळच्या कार्यकर्त्यांना तसंच कुटुंबातील व्यक्तींना उमेदवारी देण्याचं टाळलं आहे. त्याऐवजी नव्या दमाच्या कार्यकर्त्यांना भाजपनं संधी दिली आहे.

भाजपच्या तिकीट वाटपात केंद्रीय राज्यमंत्री मुरलीधर मोहोळ यांना देखील झटका बसला आहे. कारण त्यांच्या एकाही जवळच्या कार्यकर्त्याला भाजपनं उमेदवारी दिलेली नाही. प्रभाग क्र. 31 मधून AB फॉर्म दिलेल्या निलेश कोंढाळकरांना भाजपनं माघार घ्यायला लावली. तसंच श्रीधर मोहोळ, दुष्यंत मोहोळ यांची उमेदवारी कापली असून मेधा कुलकर्णी यांच्या मुलीला, माधुरी मिसाळ यांच्या मुलाला, सुनील कांबळे यांच्या मुलीला उमेदवारी देणार असल्याची चर्चा होती पण त्यांना उमेदवार दिलेली नाही.

दरम्यान, दोन आठवड्यापूर्वी भाजपमध्ये आलेले आमदार बापू पठारे यांचे चिरंजीव सुरेंद्र पठारे हे भाजपच्या सगळ्या स्थानिक नेत्यांना भारी पडलेत. त्यांनी आपल्या कुटुंबासाठी भाजपकडून 2 AB फॉर्म मिळवले. तर अन्य 5 फॉर्म कार्यकर्त्यांसाठी मिळवल्याची माहिती आहे. याशिवाय माजी आमदारांपैकी योगेश मुळीक, दिवंगत मुक्ता टिळक, गिरीश बापट यांच्या कुटुंबियांना मात्र भाजपनं उमेदवारी दिली आहे.

त्यामुळं सध्या राज्यात किंवा केंद्रात मंत्रीपद दिलेल्या नेत्यांच्या तसंच विद्यमान आमदार-खासदार असलेल्या नेत्यांच्या कार्यकर्त्यांना किंवा कुटुंबियांना भाजपनं सबुरीचा सल्ला दिला आहे. तर दुसरीकडं माजी आमदार-खासदारांच्या जवळच्या लोकांना मात्र उमेदवारी दिली आहे. त्याचबरोबर उर्वरित बऱ्याच जागांवर ताज्या दमाच्या नव्या उमेदवारांना भाजपनं उमेदवारी दिली आहे. गेल्या निवडणुकीतील ९९ जागांचा विक्रम मोडण्याचा विश्वास भाजपच्या कार्यकर्त्यांकडून करण्यात आला आहे.