Pune Police on Satish Wagh murder Case : भाजपचे आमदार योगेश टिळेकर यांचे मामा सतीश वाघ यांचे सोमवारी पहाटे हडपसर परिसरातून अपहरण झाले आणि त्यानंतर त्यांचा खून करण्यात आला. यानंतर सायंकाळी 6 च्या दरम्यान यवत पोलीस स्टेशनच्या हद्दीतील शिंदवणे घाटात त्यांचा मृतदेह सापडला. यानंतर आता तपासाला वेग आला असून काही महत्त्वाचे धागेदोरे पोलिसांच्या हाती लागल्या असल्याचे समोर आले आहे. त्या आधारे पोलीस लवकरच आरोपी पर्यंत पोहचतील असं सांगण्यात येत आहे.
हडपसर भागातील मांजरी येथे सतीश वाघ वास्तव्यास होते. भाजपच्या विधान परिषदेचे आमदार योगेश टिळेकर(Yogesh Tilekar) यांचे ते सख्खे मामा होते. पहाटेच्या सुमारास ते नेहमीप्रमाणे मॉर्निंग वॉकसाठी सोमवारी ते घराबाहेर पडले होते. त्यानंतर कारमध्ये आलेल्या चौघांनी त्यांना जबरदस्तीने वाहनात बसवले आणि त्यांचे अपहरण करून घेऊन गेले.
याबाबतची माहिती मिळताच सतीश वाघ यांच्या मुलाने हडपसर पोलीस स्टेशनमध्ये याप्रकरणी तक्रार दिली. पोलिसांनी या प्रकरणात गुन्हा दाखल करत तपास सुरू केला यानंतर सोमवारी सायंकाळी शिंदवणे घाटात सतीश वाघ यांचा मृतदेह सापडला. काही नागरिक शिंदवणे घाटातून जात असताना रक्ताच्या थारोळ्यात पडलेला मृतदेह त्यांना दिसला. त्यानंतर त्यांनी स्थानिक पोलिसांना माहिती दिली. माहिती मिळताच पोलीस घटनास्थळी दाखल झाले.
सतीश वाघ यांच्या अंगावरती तीक्ष्ण हत्याराने वार केले असल्याचं दिसून आलं तसंच त्यांच्या मृतदेहाजवळ लाकडी दांडके देखील आढळून आले या लाकडी दांडक्याच्या साह्याने वाघ यांच्या डोक्यावरती आघात करण्यात आल्या असल्याचे सांगण्यात येत आहे. त्यानंतर मृतदेह शिंदवणे घाटात टाकून अपहरणकर्ते पसार झाले.
अपहरण केल्यानंतर सुरुवातीच्या काही तासातच आरोपींनी सतीश वाघ यांचा खून केला असण्याची शक्यता आहे. पोलिसांची १६ पथके या गुन्ह्याच्या तपासासाठी कामाला लागली आहेत. श्वानपथक आणि फॉरेन्सिक टीमच्या टेक्निकल डाटाच्या माध्यमातून पुरावे गोळा करण्याचे काम पोलिसांकडून सुरू आहे. दरम्यान पोलिसांकडून काही महत्त्वपूर्ण पुरावे हाती लागल्या असल्याचं बोललं जात आहे.
याबाबत माध्यमांशी बोलताना अतिरिक्त पोलीस आयुक्त मनोज पाटील यांनी याबाबत माहिती दिली आहे.पाटील म्हणाले, पुणे पोलिसांनी(Pune Police) या घटनेची गंभीर दखल घेतली आहे. पुणे पोलीस आणि झोन कडून तब्बल दहा टीम या घटनेचा तपास करत आहेत. तसेच क्राईम ब्रांच सहा टीम या प्रकरणाचा छडा लावण्याचा प्रयत्न करत आहे.
तपासामध्ये टेक्निकल पुराव्यांसह ह्युमन इंटेलिजन्सचा देखील वापर करण्यात येत आहेत. तपासामध्ये प्रगती असून तपास मध्ये बाधा येईल अशा गोष्टींचा खुलासा आत्ता करता येणार नाही असं पाटील म्हणाले. पोलीस आरोपींच्या जवळ पोहोचलेत का असं विचारलं असता पाटील म्हणाले, या घटनेचा छडा लवकरच लागेल. कारण पोलीस वेगाने तपास करत आहेत.
(Edited by - Mayur Ratnaparkhe)
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.