Prashant Jagtap On Amit Shah : तडीपार अमित शाह यांना पुण्याच्या जगतापांनी, 'असं काही सुनावलं...'

Pune News : पुण्यामधील भाजपच्या अधिवेशनामध्ये गृहमंत्री अमित शाह यांनी राष्ट्रवादी काँग्रेस शरदचंद्र पवार पक्षांचे अध्यक्ष शरद पवार यांच्यावर जोरदार हल्लाबोल केला होता. शरद पवार भ्रष्टाचारांचे प्रमुख आहेत, असं अमित शाह यांनी टिका करताना म्हटले. अमित शाह यांची टिका राष्ट्रवादी काँग्रेस शरद पवार पक्षाच्या कार्यकर्ते आणि पदाधिकाऱ्यांच्या चांगलीच जिव्हारी लागली असून यानंतर शरद पवार गटाकडून भाजप आणि अमित शाह यांच्यावर जोरदार प्रतिहल्ले सुरू झालेत.

राष्ट्रवादी काँग्रेस पार्टी शरदचंद्र पवार पक्षाचे पुणे शहराध्यक्ष प्रशांत जगताप यांनी पुण्यात पत्रकार परिषद घेत अमित शाह यांच्यावर हल्लाबोल केला. जगताप म्हणाले, "भाजपचे (BJP) लोक पुण्यात येऊन गेले, त्यांनी काय विकास केला हे सांगण्यापेक्षा पवार साहेबांवर टिका करत बसले. महाराष्ट्र बातम्यांमध्ये यायचं असेल, तर पवार साहेबांवर टिका करणे हा त्यांचा एककल्ली कार्यक्रम आहे".

एका केसमध्ये गृहमंत्री अमित शाह (Amit Shah) तडीपार होते. त्यांनी पवार साहेबांना भ्रष्टाचाराचे सरदार म्हणणे हे बालिशपणाचे आहेच पण, आपली बुद्धी किती आहे हे दाखवून दिले आहे. तुम्ही तडीपार झाल्यानंतर महाराष्ट्रात का आश्रय घ्यावा वाटलं? नेमकी तुम्ही कोणत्या कारणासाठी तडीपार होता, हे तुम्ही देशातील जनतेला सांगावा, असं आव्हान जगताप यांनी अमित शाह यांना दिलं.

पवार साहेबांचे योगदान नसेल, तर अमित शाह यांचं काय योगदान आहे हे त्यांनी सांगावं. शरद पवार भ्रष्टाचार टोळीचे प्रमुख असतील, तर एखादा टोळीचा प्रमुख असेल, मग त्या टोळीचे सदस्य तुमच्याकडे आहेत, ते साधू संत आहेत का? पवार भ्रष्टाचाराचे सरदार असतील, तर मोदी सरकारने पद्मविभूषण का दिले? असे सवाल देखील जगताप यांनी उपस्थित केला.

जगताप म्हणाले, "केंद्रीय मंत्री मुरलीधर मोहोळ यांना खुलं चॅलेंज आहे, त्यांनी हिशोब दाखवावाच. आगामी काळात आम्ही नगरसेवकाचे पैसे खाऊन आमदाराचा निधी कसा वापरला, याचे पुरावे घेऊन आम्ही समोर येऊन भाजप शहराध्यक्ष धीरज घाटे यांचा मुखवटा फाडणार आहोत". 9 ऑगस्ट क्रांती दिनापासून भाजपचा मुखवटा फडण्याचं काम करू, असा इशारा जगताप यांनी दिला.