Pravin Gaikwad : "पोलीस संरक्षण घेणार नाही"; शाई फेक हल्ल्यानंतर प्रविण गायकवाडांनी घेतली शरद पवारांची भेट

Pune News, 17 Jul : संभाजी ब्रिगेडचे प्रदेशाध्यक्ष प्रविण गायकवाड यांच्यावर अक्कलकोट येथे शाई फेक आणि हल्ला करण्यात आला होता. हल्लेखोरांनी त्यांच्या तोंडाला काळं फासल्यानंतर राज्यभरातील संभाजी ब्रिगेडचे कार्यकर्ते आक्रमक झाले आहेत.

हल्लेखोरांनी माझी हत्या करण्याचा कट रचला होता आणि हा हल्ला भाजप पुरस्कृत असल्याचा आरोप खुद्द गायकवाड यांनी काल पत्रकार परिषद घेऊन केला होता. अशातच आता प्रविण गायकवाड यांनी राष्ट्रवादी काँग्रेसचे (शरद पवार) अध्यक्ष शरद पवार यांची भेट घेत त्यांना हल्ल्याबाबतची सविस्तर माहिती सांगितली आहे.

प्रवीण गायकवाडांनी शरद पवारांची पुण्यात भेट घेतली. यावेळी त्यांनी या विषयात अनेकांवर निशाणे साधले जाऊ शकतात, असा अंदाज व्यक्त करत दीपक काटे भाजप नेते चंद्रशेखर बावनकुळेंना गॉडफादर मानतात. त्यामुळे गृहमंत्र्यांनी लक्ष घालावं अशी अपेक्षा पवारांसमोर व्यक्त केल्याचं सांगितलं.

या भेटीबद्दल माध्यमांना माहिती देताना ते म्हणाले, "माझ्यावर हल्ला झाल्यापासून राज्यातील अनेक नेते मला फोन करत आहेत. शरद पवार साहेबांनी देखील कॉल केले. त्यांनी सध्याची परिस्थिती योग्य नाही काळजी घे, असं सांगितलं होतं. अशातच आज पुण्यात पवार साहेबांची भेट घेऊन घडलेल्या सर्व प्रकार त्यांच्या कानावर घातला. यावेळी माझा जो संशय आहे की मला मारण्याचा कट होता, ते देखील मी त्यांना सांगितलं."

यावर शरद पवारांनी मी संपूर्ण प्रकरणाची माहिती घेत असून माझ्या पद्धतीने सरकारला माहिती कळवतो, असं सांगितल्याचं गायकवाड म्हणाले. तर पोलिसांनी सहकार्य केलं नाही म्हणून मी आता त्यांचं संरक्षण घेणार नसल्याचंही पवारांना सांगितल्याचं ते म्हणाले.

अनेक मंत्र्यांचा पोलिसांवर दबाव असून दोन दिवसांत दीपक काटेंना सोडून द्या, असं ते पोलिसांना सांगत आहेत, असंही गायकवाड यांनी पवारांसमोर सांगितलं. दरम्यान, प्रवीण गायकवाडांना काळे फासणाऱ्या शिवधर्म संघटनेच्या कार्यकर्त्यांवर गुन्हा दाखल करण्यता आला आहे. यामध्ये दीपक काटेसह एकूण 7 जणांवर गुन्हा दाखल करण्यात आला आहे.