Pune Crime News : रितेश कुमार यांची धडक कारवाई सुरूच; राजन लावंडसह टोळीतील पाचजणांवर मोका..

Pune News: पुण्यात हडपसर परिसरात दहशत माजवून लुटमार करणाऱ्या सराईत गुंड राजन लावंड यांच्यासह पाच साथीदारांविरूद्ध मोक्कानुसार सोमवारी कारवाई करण्यात आली आहे. पोलिस आयुक्त रितेश कुमार यांनी मोक्कानानुसार केलेली ही आतापर्यंतची बावीसावी कारवाई आहे.

पुण्याचे पोलिस आयुक्त रितेश कुमार यांनी मोठया प्रमाणात शहरात मोक्का अंतर्गत कारवाई केल्याने, गुन्हेगारांच्या मुसक्या आवळल्या गेल्या आहेत. पुणे शहरातील गुन्हेगारी मोडून काढण्यासाठी पोलिस आयुक्त रितेश कुमार यांनी महाराष्ट्र संघटित गुन्हेगारी नियंत्रण (मोक्का) कायद्यांतर्गत धडक कारवाई केली.

राजन रघुनाथ लावंड (वय २१) (टोळीप्रमुख), ओम ऊर्फ पिंटू विनोद भंडारी (वय २२), ऋषिकेश ऊर्फ मेघराज प्रवीण शितोळे (वय १९), रोशन हनुमंत सोनकांबळे (वय २१) आणि सागर शिवाजी घायतडक (वय १९, सर्वजण रा. माळवाडी, हडपसर) यांच्याविरुध्द मोका कायद्यांतर्गत कारवाई करण्यात आली आहे. आरोपी लावंड यांच्या विरोधात विविध गंभीर स्वरूपाचे गुन्हे दाखल आहेत

हडपसर परिसरात अपहरण, खुनाचा प्रयत्न, दरोडा, गंभीर दुखापत विनयभंग असे गंभीर स्वरूपाचे गुन्हे करणाऱ्या राजन लावंड टोळीतील पाच जणांविरुद्ध मोक्का कायद्यांतर्गत कारवाई केली आहे. वारंवार कारवाई करूनही त्यांच्या वर्तनात सुधारणा होत नव्हती असे पोलिसांच्या निर्देशनास आले.त्यामुळे याप्रकरणी संबंधित टोळीविरूद्ध मोक्कानुसार कारवाई सुरु केली आहे.

पोलिसांनी दिलेल्या माहितीनुसार, अनिकेत घायतडक यांच्या खुनाचा राग मनात धरून राजन लावंड आणि त्याच्या साथीदारांनी एकाला मारहाण केली होती. उपचारादरम्यान त्याचा मृत्यू झाला होता. याप्रकरणी हडपसर पोलिसांनी राजन लावंड टोळीतील पाच जणांना अटक केली होती.

दरम्यान, परिमंडळ पाचचे पोलिस उपायुक्त विक्रांत देशमुख यांनी टोळीप्रमुख राजन लावंड याला दोन वर्षांसाठी तडीपार केले होते. परंतु त्याने वारंवार गंभीर गुन्हे केल्याचे पोलिस तपासात समोर आले आहे. हडपसर पोलिस ठाण्याचे वरिष्ठ निरीक्षक अरविंद गोकुळे यांनी पोलिस उपायुक्त यांच्यामार्फत या लावंड टोळीविरुद्ध मोकाचा प्रस्ताव पाठवला होता. अतिरिक्त आयुक्त रंजन कुमार शर्मा यांनी मोकाच्या कारवाईस मान्यता दिली.