BJP News : आधी हिंदुत्व, मग निवडणूक! पुण्यात भाजपने स्वत:च्याच उमेदवाराला घ्यायला लावली माघार

BJP News : सोशल मीडियावर हिंदुविरोधी भूमिकेचे व्हिडीओ व्हायरल होताच भाजपने आधी हिंदुत्व, मग निवडणूक या भूमिकेला प्राधान्य देत आपल्याच उमेदवाराला निवडणुकीतून माघार घ्यायला लावली आहे. गुरुवारी महापालिका निवडणुकीसाठी अर्ज मागे घेण्याच्या पहिल्याच दिवशी पुण्यातील प्रभाग क्रमांक 2 मधील उमेदवार पुजा मोरे-जाधव यांनी पक्ष नेतृत्वाच्या आदेशानंतर अर्ज मागे घेतला.

पुणे महापालिका निवडणुकीत भाजपमधून तिकीट मिळविण्यासाठी मोठी स्पर्धा होती. तब्बल 2300 इच्छुक होते. त्यामुळे भाजपची उमेदवारी मिळवणं हे अतिशय कठीण बनलं होतं. यातून पुजा मोरे-जाधव यांना प्रभाग क्रमांक दोनमधून उमेदवारी देण्यात आली. पण उमेदवारी मिळाल्यानंतर सोशल मीडियामध्ये त्यांचे काही जुने व्हिडीओ आणि फोटो व्हायरल झाले.

यात पूजा मोरे यांनी यापूर्वी हिंदुत्वविरोधी घेतलेली भूमिका, पहलगाम हल्ल्याबाबतचे केलेलं वक्तव्य आणि मराठा आरक्षण आंदोलनादरम्यान, मुख्यमंत्री देवेंद्र फडणवीस यांच्या पत्नीबाबत केलेले विधान सोशल मीडियामध्ये व्हायरल झाले. यानंतर हिंदुत्वाच्या विरोधी भूमिका घेणाऱ्या, फडणवीस यांच्या वैयक्तिक आयुष्यावर भाष्य करणाऱ्या उमेदवाराला भाजपकडून उमेदवारी नको, असा सूर उमटू लागला. भाजपच्या स्थानिक पदाधिकाऱ्यांकडून पुजा मोरे जाधव यांना मोठ्या प्रमाणात विरोध होऊ लागला. सोशल मीडियामध्येही भाजप कार्यकर्त्यांच्या भावना तीव्र झाल्या.

अखेर या भावनांचा आदर राखून पक्ष नेतृत्वाने पुजा मोरे जाधव यांना तातडीने अर्ज मागे घ्यायला लावला. यातून आमच्यासाठी आधी हिंदुत्व आहे मग निवडणूक आहे, असा संदेश भाजपने दिल्याचे दिसून येते. अर्ज माघारी घेतल्यानंतर पुजा यांना अश्रू अनावर झाले, मात्र आपण भारतीय जनता पक्षाचे सदस्यत्व सोडणार नाही. भाजपमध्ये असेच काम करत राहणार आणि हिंदुत्वाची भूमिका घेणार असल्याचे पूजा मोरे जाधव यांनी स्पष्ट केले.