Pune municipal election : पुण्यात भाजप उमेदवारांवर निवडणुकीपूर्वीच गुलाल: एकाच प्रभागातून 2 जण बिनविरोध नगरसेवक

Pune News : राज्यभरात 29 महापालिका निवडणुकांसाठी सध्या रणधुमाळी सुरू आहे. शुक्रवारी महापालिका निवडणुकीसाठी उमेदवारी अर्ज मागे घेण्याचा शेवटचा दिवस होता. पुणे महापालिकेच्या 41 प्रभागांतील 165 जागांसाठी 15 जानेवारीला मतदान होणार आहे. त्यापूर्वीच मोठी बातमी समोर आली आहे. पुण्यातील भाजपच्या दोन उमेदवारांवर निवडणुकीपूर्वीच गुलाल पडला असून एकाच प्रभागातून 2 जण बिनविरोध नगरसेवक झाले आहेत. त्यामुळे भाजपच्या गोटात आतापासूनच जल्लोष केला जात आहे.

राज्यभरातील महापालिका निवडणुकीसाठी उमेदवारी अर्ज मागे घेण्याचा शुक्रवारी शेवटचा दिवस होता. त्यामुळे सर्वच पक्षांचे टेन्शन वाढले होते. पुणे महापालिकेतील प्रभाग क्रमांक 35 मधील भाजपच्या (BJP) दोन उमेदवारांच्या विरोधातील उमेदवारांनी आपले उमेदवारी अर्ज मागे घेतल्यामुळे दोन जण बिनविरोध विजयी झाले. निवडणुकीपूर्वीच हे दोघेजण विजयी झाल्याने भाजपच्या कार्यकर्त्यांत आनंदाचे वातावरण आहे.

पुणे महापालिका निवडणुकीसाठी उमेदवारी अर्ज मागे घेण्यासाठी 30 डिसेंबर रोजी दुपारी 3 वाजेपर्यंत मुदत होती. मुदत संपण्यापूर्वी पुण्याच्या सिंहगड रोड भागातून भाजपच्या दोन नगरसेविकेची बिनविरोध निवड झाली आहे. प्रभाग क्रमांक 35 सनसिटी माणिक बाग येथून भाजपच्या उमेदवार मंजुषा नागपुरे या बिनविरोध निवडून आलेल्या आहेत. सलग तिसऱ्यांदा त्या निवडणूक लढवत होत्या.

प्रभाग क्रमांक 35 ड सर्व साधारण या गटातून भाजपचे श्रीकांत शशिकांत जगताप हे बिनविरोध विजयी झाले आहेत. त्यांच्या विरोधातील नितीन गायकवाड यांनी शुक्रवारी उमेदवारी अर्ज मागे घेण्याच्या शेवटच्या दिवशी अर्ज माघारी घेतला. त्यामुळे भाजपचे श्रीकांत जगताप हे बिनविरोध निवडून आले आहेत.

पुणे महापालिकेतील 41प्रभागांतील 165 जागांसाठी 15 जानेवारीला मतदान होणार आहे. त्यापूर्वीच दोन उमेदवार बिनविरोध आल्याने भाजपने विजयी सलामी दिली आहे. 2017 साली झालेल्या निवडणुकीत पुणे महापालिकेत भाजपची सत्ता होती. या निवडणुकीतही भाजपने विजयी सुरुवात केली आहे. त्यामुळे आगामी काळात होत असलेल्या या चुरशीच्या निवडणुकीकडे सर्वांचे लक्ष लागले आहे.