Sunetra Pawar : विलीनीकरण होईल तेव्हा होईल मात्र पुणे जिल्ह्यापुरता 'हा' निर्णय घ्या, पदाधिकाऱ्यांची सुनेत्रा पवारांना गळ

Pune News : दिवंगत उपमुख्यमंत्री अजित पवार यांच्या अपघाती निधनानंतर सुनेत्रा पवार यांनी उपमुख्यमंत्री पदाची सूत्र स्वीकारली असून त्या आता कामाला लागल्या आहेत. गेले तीन दिवस त्यांच्याकडून बैठकांचे सत्र सुरू असून आज देखील बारामती मध्ये पुणे जिल्ह्यातील पंचायत समिती आणि जिल्हा परिषदेच्या नव्याने निवडून आलेल्या सदस्यांसोबत त्यांनी बैठक घेतली.

दौंड, पुरंदर, इंदापूर, हवेली तालुक्यातील जिल्हा परिषद, समितीचे नवनिर्वाचित सदस्य या बैठकीला उपस्थित होते. यावेळी सदस्यांची ओळख आणि त्यानंतर अनौपचारिक चर्चा संपन्न झाली. राष्ट्रवादीच्या विलीनीकरणाबाबत सध्या जोरदार चर्चा सुरू असताना त्या संदर्भाने देखील या बैठकीमध्ये चर्चा झाली असल्याचे सांगितले जात आहे. बैठकीमध्ये सुनेत्रा पवार यांच्याकडे काही पदाधिकाऱ्यांनी काही मागण्या देखील केल्या असल्याचं सांगितलं जात आहे.

उपमुख्यमंत्री सुनेत्रा पवार यांच्या उपस्थितीमध्ये इंदापूर पुरंदर तालुक्याची बैठक संपन्न झाली. या बैठकीमध्ये पुरंदर तालुक्यातील राष्ट्रवादीच्या पदाधिकाऱ्यांनी सुनेत्रा पवार यांच्यासमोर जिल्ह्यातील दोन्ही राष्ट्रवादी काँग्रेसच्या पदाधिकाऱ्यांनी एकत्रित काम करावे असा प्रस्ताव ठेवला आहे. विलनीकरण होईल तेव्हा होईल मात्र पुणे जिल्ह्यात दोन्ही राष्ट्रवादी एकत्रित काम करतील आणि पुणे जिल्ह्यापुरता हा निर्णय तरी तुम्ही घ्यावा अशी मागणी पदाधिकाऱ्यांनी केली आहे.

यावेळी सुनेत्रा पवार यांनी देखील पदाधिकाऱ्यांना शब्द दिला असून मी कुठल्याही कार्यकर्त्यांना वाऱ्यावर सोडणार नाही असे सांगितले. तसेच निवडणुकीच्या वेळी अजित पवारांनी जो शब्द दिला होता की दोन्ही राष्ट्रवादीचे उमेदवार हे आपले आहेत. तो पाळला जाईल.

तुतारी चिन्हा चे उमेदवार जे घड्याळावर निवडून आलेले आहेत. त्यांच्यामध्ये कुठलाही संभ्रम नाही अशी माहिती यावेळी बैठकीमध्ये कार्यकर्त्यांनी उपस्थित केली. तेव्हा सुनेत्रा पवार यांनी सर्व कार्यकर्त्यांच्या पाठीशी मी नेहमी उभा असेल असा शब्द दिला. याबाबत राष्ट्रवादी काँग्रेसचे पदाधिकारी विजय कोलते यांनी माहिती दिली आहे.