Pune Police : रमीचा नाद अन् थेट तुरूंगात! पुणे पोलिसांची मोठी कारवाई, जुगार अड्ड्यावर छापेमारी करत भाजप पदाधिकाऱ्याला ठोकल्या बेड्या

Pune Police, 12 Aug : पुणे पोलीस मागील काही दिवसांपासून चांगलेच अ‍ॅक्टीव्ह मोडवर आल्याचं पाहायला मिळत आहे. कारण त्यांनी मागील काही दिवसांत अनेक मोठ्या कारवाया केल्या आहेत. नुकतंच पुणे पोलिसांनी केलेल्या रेव्ह पार्टीवरील कारवाईची चर्चा सुरू असतानाच आता त्यांनी आणखी एक मोठी कारवाई केली आहे.

ती म्हणजे एका जुगार अड्ड्यावर छापेमारी करत त्यांनी 4 ते 5 जणांना ताब्यात घेतलं आहे. महत्वाची बाब म्हणजे या अड्ड्यावर जुगार खेळणाऱ्या भाजप पदाधिकाऱ्याला पोलिसांनी रंगेहाथ पकडल्यामुळे या प्रकरणाची सध्या पुण्यात जोरदार चर्चा सुरू आहे. मिळालेल्या माहितीनुसार काल सोमवारी (ता.11) पुणे पोलिसांनी जुगार अड्ड्यावर छापेमारी केली.

यावेळी तिथे जुगार खेळणाऱ्या भाजप (BJP) पदाधिकाऱ्याला पोलिसांनी ताब्यात घेतलं. औदुंबर विठ्ठल कांबळे असे या भाजपच्या पदाधिकाऱ्याचे नाव आहे. औदुंबर कांबळेसह आणखी 2 ते 3 जणांना पोलिसांनी ताब्यात घेतलं असून सहकारनगर पोलीस ठाण्यात या सर्वांवर गुन्हा दाखल करण्यात आला आहे.

पुणे पोलिसांच्या गुन्हे शाखेची आणि सहकारनगर पोलिसांनी ही छापेमारी केली. तर जुगार खेळताना सापडलेला औदुंबर कांबळे हा पर्वती विधानसभा मतदारसंघाचा चिटणीस म्हणून कार्यरत असल्याची माहिती समोर आली आहे. कांबळे हा त्याच्या सहकाऱ्यांसोबत तळजाई परिसराततील एका बंद कारखान्यात रमी खेळत असल्याची माहिती पोलिसांना मिळाली.

त्यानंतर सहकार नगर पोलीस आणि गुन्हे शाखेच्या युनिटने छापा टाकत या सर्वांना जुगार खेळताना रंगेहात पकडलं आणि त्यांना ताब्यात घेतलं. मात्र, सत्ताधारी पक्षाच्या एका पदाधिकाऱ्यालाच जुगाराच्या अड्ड्यावरून अटक केल्यामुळे ही कारवाई चर्चेचा विषय ठरली आहे. त्यामुळे आता पुणे भाजपचे नेते यावर काय प्रतिक्रिया देणार आणि या पदाधिकाऱ्यावर काय कारवाई करणार? याकडे सर्वाचं लक्ष लागलं आहे.