Pune News : महाराष्ट्र नवनिर्माण सेनेचे अध्यक्ष राज ठाकरे यांच्या पुणे दौऱ्यादरम्यान आज पक्षाच्या पदाधिकारी आणि कार्यकर्त्यांची महत्त्वाची बैठक पार पडली. आगामी स्थानिक स्वराज्य संस्था निवडणुकांच्या पार्श्वभूमीवर ही बैठक अत्यंत महत्त्वाची मानली जात होती. मात्र, या बैठकीत राज ठाकरे पदाधिकाऱ्यांवर प्रचंड नाराज दिसले.
बैठकीत राज ठाकरे यांचं लक्ष पुढच्या खुर्चीवर बसलेल्या रमेश परदेशी उर्फ पिट्याकडे गेलं. 'मुळशी पॅटर्न' चित्रपटातील भूमिकेमुळे प्रसिद्धी मिळवलेले आणि मनसे चित्रपट सेनेचे उपाध्यक्ष तसेच शाखा अध्यक्ष असलेले परदेशी यांना राज ठाकरे यांनी त्यांच्या सोशल मीडियावरील पोस्टबाबत जाब विचारला.
काही दिवसांपूर्वी रमेश परदेशी यांनी सोशल मीडियावर आरएसएसच्या संचलनाचा फोटो पोस्ट केला होता आणि त्यात "आरएसएसचा कट्टर समर्थक" असं लिहिलं होतं. या फोटोबाबत विचारत राज ठाकरे यांनी परदेशी यांना कार्यकर्त्यांसमोरच खडसावलं असल्याचं सांगितलं जात आहे. छातीठोकपणे सांगत होतास मी संघाचा कार्यकर्ता आहे... मग इकडे कशाला टाईमपास करतोस?" असा सवाल करत "एकाच ठिकाणी कुठे तरी राहा!" असे सुनावल्याची कुजबूज बैठकीनंतर होती.
याबाबत माध्यमांशी बोलताना परदेशी म्हणाले, आजची पक्षांतर्गत बैठक होती. मागील बैठकीमध्ये पक्षाच्या पदाधिकाऱ्यांना मतदार यादी संदर्भात राज ठाकरे यांनी एक टास्क दिला होता. बऱ्याचशा पदाधिकाऱ्यांनी तो टास्क पूर्ण केला नव्हता. त्याबाबत या बैठकीमध्ये चर्चा झाली. आगामी निवडणुकीच्या दृष्टिकोनातून आपल्याला जर निवडणुकीला सामोरे जायचं असेल तर मतदार याद्यांवर काम करणं आवश्यक असल्याचं राज ठाकरे यांनी सांगितलं.
‘आरएसएस’ संचलनातील फोटोबाबत राज ठाकरेंनी खडसवल्याबाबत चर्चा सुरू आहेत. यावर विचारले असता परदेशी म्हणाले, राज ठाकरे साहेबांचं बोलण्याचं टायमिंग परफेक्ट आहे आणि त्यांचा मिश्कील स्वभाव देखील सर्वांना माहित आहे. बैठक सुरू असताना त्यांचा अचानकपणे माझ्याकडे लक्ष गेलं. त्यांनी विचारलं, फोटोचं काय आहे? त्यावर मी उत्तर दिलं आहे. इतकंच साधं संभाषण झालं.
राजसाहेब हे आमचे कुटुंब प्रमुख आहेत. त्या अधिकाऱाने ते बोलत असतात आणि त्यांनी बोललंच पाहिजे. कारण एक राजकीय पक्ष आणि पक्षासाठी निवडणुका ह्या महत्त्वाच्या असतात त्यामुळे निवडणुकीच्या कामाच्या दृष्टिकोनातून ते अग्रेसिव्ह बोलत होते. राज ठाकरे यांनी माझा तो फोटो बघितला. परंतु मी संघाचा स्वयंसेवक आहे. हे मी कधीही लपवलेलं नाही. तसंच मी राज साहेबांशी पक्ष स्थापनेच्या आधीपासून संबंधित आहे. मात्र ज्या पद्धतीने माध्यमांसमोर या सगळ्या गोष्टी आल्या, त्या पद्धतीने त्या घडलेल्या नाहीत, असे परदेशी यांनी स्पष्ट केले.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.