Shirwal Accident: शिरवळ येथे भीषण अपघात; मावळातील तीन युवकांसह चौघांचा मृत्यू, दोघे गंभीर जखमी

विजय सुराणा

तळेगाव दाभाडे : पुणे–सातारा महामार्गावर शिरवळ (ता. खंडाळा, जि. सातारा) येथे मंगळवारी (११ ऑगस्ट) पहाटेच्या सुमारास झालेल्या भीषण अपघातात मावळ तालुक्यातील तीन युवकांसह चौघांचा जागीच मृत्यू झाला. भरधाव कार डिव्हायडरला धडकून पलटी झाल्यानंतर विरुद्ध दिशेच्या लेनमध्ये गेली. त्याचवेळी समोरून येणाऱ्या ट्रकला कारची जोरदार धडक झाली. या दुर्घटनेत दोघे जखमी झाले असून त्यांच्यावर रुग्णालयात उपचार सुरू आहेत.

Pune Shirwal accident news: शिरवळ येथील हॉटेल शिवालयसमोर पहाटे सुमारे १.१० वाजता हा अपघात झाला. मिळालेल्या प्राथमिक माहितीनुसार, पुण्याहून साताऱ्याच्या दिशेने कार (एमएच १४ एलजे ३०३३) जात होती. त्यावेळी चालकाचे वाहनावरील नियंत्रण सुटल्याने कार महामार्गाच्या डिव्हायडरला जोरात धडकली.

डिव्हायडरला धडकल्यानंतर कार पलटी झाली आणि महामार्गाच्या विरुद्ध दिशेच्या लेनमध्ये जाऊन पडली. याचवेळी साताऱ्याच्या दिशेने विरुद्ध बाजूने येणाऱ्या ट्रकला (केए २७ सी ५८७८) कारची जोरदार धडक झाली. धडक एवढी भीषण होती की कारचा मोठ्या प्रमाणात चुराडा झाला.

मावळातील तीन तरुणांचा दुर्दैवी अंत

या अपघातात वेदांत अर्जुन वारिंगे (वय १९, रा. तळेगाव दाभाडे), सोनलिंग धीरेंद्र ठाकूर (वय १९, रा. कामशेत), आदित्य बाळासाहेब गरुड (वय १९, रा. टाकवे) आणि निखिल बाळू राऊत (वय २०, रा. कामशेत) यांचा मृत्यू झाला.

मृतांपैकी तीन युवक हे मावळ तालुक्यातील असल्याने या दुर्घटनेने तळेगाव दाभाडे, कामशेत आणि टाकवे परिसरावर शोककळा पसरली आहे. तरुण वयातील चौघांचा अपघाती मृत्यू झाल्याने त्यांच्या कुटुंबीयांवर दुःखाचा डोंगर कोसळला आहे.

दोघे जखमी; रुग्णालयात उपचार सुरू

या दुर्घटनेत दीक्षित दयानंद पुजारी (२०, रा. कामशेत) आणि मयूर हनुमंत शिंदे (२०, रा. बहुर, कामशेत) हे दोघे जखमी झाले आहेत. अपघातानंतर त्यांना तातडीने रुग्णालयात दाखल करण्यात आले असून त्यांच्यावर उपचार सुरू आहेत.

महामार्ग पोलिसांकडून मदतकार्य

अपघाताची माहिती मिळताच महामार्ग पोलिस मदत केंद्र, सारोळा येथील अधिकारी आणि कर्मचारी तातडीने घटनास्थळी दाखल झाले. अपघातग्रस्त वाहनांमुळे महामार्गावरील वाहतुकीवर परिणाम झाला होता. पोलिसांनी क्रेनच्या साहाय्याने कार आणि आयशर ट्रक बाजूला करून महामार्गावरील वाहतूक सुरळीत केली.

या अपघाताची नोंद शिरवळ पोलिस ठाण्यात करण्यात आली असून अपघात नेमका कोणत्या कारणामुळे झाला, वाहनाचा वेग किती होता आणि चालकाचे नियंत्रण का सुटले, याबाबत पोलिसांकडून पुढील तपास व कायदेशीर कार्यवाही सुरू आहे.