PCMC News : पिंपरी-चिंचवड महापालिका निवडणुकीच्या पार्श्वभूमीवर शिवसेना उद्धव बाळासाहेब ठाकरे पक्षातील महिला पदाधिकाऱ्याने पत्रकार परिषद घेत माजी आमदार गौतम चाबूकस्वार यांच्यावर गंभीर आरोप केला आहे.
'जे दाखवायचं ते दाखवत नाहीस, असे म्हणत चाबूकस्वार यांनी विनयभंग केला तसेच शरीर सुखाची मागणी पूर्ण न केल्यामुळे महापालिकेच्या निवडणुकीचे तिकीट आपले तिकीट कापले.', असा आरोप महिला पदाधिकाऱ्याने केला आहे. दरम्यान, हे सर्व आरोप गौतम चाबुकस्वार यांनी फेटाळले आहेत.
पिंपरी विधानसभेत पदाधिकारी असलेल्या महिलेने गुरुवारी पत्रकार परिषद घेत आरोप केला की, शिवसेनेमध्ये गेले आठ वर्ष झाले काम करत असून पिंपरी विधानसभा समन्वयक म्हणून पक्ष वाढीसाठी काम केले आहे. पक्ष न्याय देईल या हेतूनेच प्रभागांमध्ये अनेक उपक्रम राबवले व अनेक समाज उपयोगी कामे केली आहेत. कामे करत असताना पक्षाचे माजी आमदार गौतम चाबुकस्वार यांनी वारंवार शारीरिक मागणी करून हीन वागणूक दिली आहे.
'कामानिमित्त त्यांच्या पिंपरीतील कार्यालयात भेटण्यासाठी अनेक वेळा गेले तेव्हा त्यांनी विनयभंग होईल, असे वक्तव्य करत जवळीक साधण्याचा प्रयत्न केला. लोकसभा निवडणुकीच्या वेळी कासारवाडी येथे प्रचार करत असताना एका बिल्डिंगमध्ये प्रचारासाठी गेलो असता लिफ्टमध्ये अश्लील वर्तन केले. मी त्यावेळी पोलिसात धाव घेण्यासाठी प्रयत्न केले परंतु चाबूस्वार यांनी तुला आयुष्यातून उठवेल अशी धमकी दिली. त्यामुळे घाबरून या घटनेची कुठेही वाच्यता केली नाही.', असे महिला पदाधिकाऱ्याने म्हटले आहे.
'काही दिवसांपूर्वी आकुर्डी येथील शिवसेना कार्यालयामध्ये बैठकीनिमित्त गेले असता तिथे अश्लील हावभाव करून शरीर सुखाची मागणी केली. तसेच तुला पहिल्यापासून सांगत आलोय कॉम्प्रोमाइज कर तिकीट फिक्स होईल” असे बोलून मानसिक त्रास दिला.', असे सांगत सततच्या मागण्यांना नकार देत आल्यामुळेच माझे तिकीट कापले आहे, असे देखील महिला पदाधिकाऱ्याने पत्रकार परिषदेमध्ये सांगितले.
माझ्यावर एका महिलेने केलेले आरोप गलिच्छ आणि खोडसाळपणाचे तसेच निराधार आहेत. मी केवळ वरिष्ठांच्या आदेशानुसार पिंपरी चिंचवड महापालिका सार्वत्रिक निवडणुकीसाठी योग्य उमेदवारांची निवड करण्यासाठीच्या प्रक्रियेमध्ये कोर कमिटीचा अध्यक्ष म्हणून सहभागी होतो. या महिलेला पिंपरी चिंचवड महापालिका निवडणुकीसाठी दापोडी प्रभाग क्रमांक ३० येथून उमेदवारी मिळाली नाही; म्हणून हे खोडसाळपणाचे आरोप केले आहेत. याबाबत मी पक्षातील वरिष्ठांकडे तक्रार केली आहे. त्यांच्या निर्देशानुसार योग्य ती कारवाई या महिलेवर होईल, असे शिवसेना उद्धव बाळासाहेब ठाकरे पक्षाचे पिंपरी चिंचवड जिल्हाप्रमुख, माजी आमदार ॲड. गौतम चाबुकस्वार यांनी सांगितले.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.