Pune News : धक्कादायक : शंभर रुपयांसाठी विद्यार्थ्यावर हल्ला ; हात मनगटापासून निखळला..

Pune News : शिक्षणाचे माहेरघर असलेल्या पुण्यात (Pune)मानवतेचा काळीमा फासणारी घटना घडली आहे. एका विद्यार्थ्यावर धारदार शस्त्राने वार करण्यात आला. यात त्याचा हात मनगटापासून कापला गेला आहे. याप्रकरणी दोन जणांना अटक करण्यात आली आहे. आणखी दोन अल्पवयीन मुलांना पोलिसांनी ताब्यात घेतले आहे. रविवारी मध्यरात्री ही घटना घडली.

पु्ण्यातील पाषाण भागात ही घटना घडली आहे. चतुश्रृंगी पोलीस ठाण्यात याप्रकरणी गुन्हा दाखल करण्यात आला आहे. या हल्ल्यात पंकज तांबोळी हा जखमी झाला आहे. त्याचा मित्र आशुतोष माने (२४) याने पोलिसांकडे फिर्याद दिली आहे. प्रणव काशिनाथ वाघमारे (१८) आणि गौरव गौतम मानवतकर (२०) अशी अटक केलेल्यांची नावे आहेत.

३१ डिसेंबर रोजी मेस बंद असल्यामुळे आशुतोष माने , साजीद शेख, पंकज तांबोळी हे तिघेजण रात्री पावणे बारा वाजण्याच्या सुमारास साई चौकात आले. तेथे पंकजचा मित्र मयुर फुंदे हा देखील जेवण करण्यासाठी आला होता. सर्वांनी एका हॉटेलमध्ये जेवण केले. त्या ठिकाणी मोटारसायकलवरून २ मुले आली आणि त्यांनी मयुर व पंकज यांच्याकडे शंभर रूपयांची मागणी केली.

पंकजने पैसे नसल्याचे त्यांना सांगितले. त्या दोन मुलांनी आणखी दोन जणांना तिथे बोलवून पंकजला शिवीगाळ केली आणि त्याच्या डाव्या हातावर धारदार हत्याराने वार केले. काही क्षणातच पंकजचा डावा हात मनगटापासून निखळून पडला. पोलिसांनी घटनास्थळी धाव घेत पंकजला रुग्णालयात दाखल केले आहे. चतुश्रृंगी पोलिसांनी या प्रकरणी दोघांना अटक केली आहे. अन्य दोन अल्पवयीन मुलांना ताब्यात घेतले आहे.