Sunetra Pawar: उपमुख्यमंत्री अजित पवार यांच्या विमान अपघातातील निधनानंतर राष्ट्रवादी काँग्रेसमध्ये नेतृत्वाबाबत निर्माण झालेली अनिश्चितता आता संपणार आहे. राज्याच्या पहिल्या महिला उपमुख्यमंत्री म्हणून दिवंगत अजित पवारांच्या पत्नी सुनेत्रा पवार या शपथ घेणार आहेत. राष्ट्रवादी काँग्रेस पक्षाच्या विधिमंडळ गटनेत्या म्हणून त्यांची उद्याच (ता.३१) निवड करण्यात येणार असून त्यानंतर राजभवनात शपथविधी पार पडण्याची शक्यता आहे. राष्ट्रवादी काँग्रेसच्या ज्येष्ठ नेत्यांनी शुक्रवारी मुख्यमंत्री देवेंद्र फडणवीस यांची भेट घेऊन याबाबत त्यांच्याशी औपचारिक चर्चा केली. त्यानंतर हा निर्णय घेण्यात आल्याचे सांगण्यात येत आहे.
अजित पवार यांच्यानंतर उपमुख्यमंत्रीपद सुनेत्रा पवार यांनीच स्वीकारावे, अशी राष्ट्रवादी काँग्रेसच्या सर्व कार्यकर्ते आणि नेत्यांची इच्छा होती. त्यानुसार सुनेत्रा पवार यांना याबाबत विचारणा करण्यात आली होती, त्यांच्याकडून होकार आल्यानंतरच त्यांची विधिमंडळ गटनेतेपदी निवड करण्याचा निर्णय पक्षाकडून घेण्यात आला. उद्या (ता.३१) दुपारी पक्षाच्या सर्व आमदारांची बैठक विधानभवनात होणार असून यात पक्षाच्या विधिमंडळ गटनेतेपदी सुनेत्रा पवार यांची सर्वानुमते निवड केली जाणार आहे. त्यानंतर मुख्यमंत्री फडणवीस यांना त्याबाबतचे पत्र दिल्यानंतर मुख्यमंत्री कार्यालयाकडून राज्यपाल कार्यालयाकडे याबाबत माहिती कळविण्यात येईल. त्यानंतर तातडीने साध्या पद्धतीनं शपथविधी पार पडू शकतो.
राष्ट्रवादीचे नेते फडणवीसांना भेटले
राष्ट्रवादी काँग्रेसचे कार्याध्यक्ष प्रफुल्ल पटेल आणि प्रदेशाध्यक्ष सुनील तटकरे यांनी आज मुख्यमंत्री देवेंद्र फडणवीस यांची त्यांच्या ‘वर्षा’ या शासकीय निवासस्थानी भेट घेतली. यावेळी राष्ट्रवादी काँग्रेस पक्षाच्या विधिमंडळ नेतेपदी सुनेत्रा पवार यांची निवड करण्याबाबत चर्चा झाली. त्यानंतर मुख्यमंत्री फडणवीस यांनी माध्यमांशी बोलताना राष्ट्रवादी काँग्रेस पक्ष जो निर्णय घेईल त्याला आमचा पाठिंबा असेल असं जाहीर केलं होतं. त्यानंतर मुख्यमंत्र्यांनी राज्यपाल आचार्य देवव्रत यांची वेळ घेऊन शपथविधीची वेळही निश्चित केल्याचं समजतं.
दिवसभरात काय घडलं?
राष्ट्रवादी काँग्रेसचे कार्यकारी अध्यक्ष प्रफुल्ल पटेल, प्रदेशाध्यक्ष खासदार सुनील तटकरे, अन्न व नागरी पुरवठा मंत्री छगन भुजबळ आणि आमदार धनंजय मुंडे यांच्या शिष्टमंडळाने सकाळी मुख्यमंत्री फडणवीस यांची त्यांच्या ‘वर्षा’ या अधिकृत निवासस्थानी भेट घेतली. या भेटीत पुढील वाटचालीबाबत चर्चा झाली. यानंतर प्रफुल्ल पटेल आणि सुनील तटकरे यांच्यातील चर्चा पार पडल्यानंतर सुनेत्रा पवार यांची नेतेपदी निवड करण्याबाबत अंतिम निर्णय घेण्यात आला. त्या अनुषंगानं आता राष्ट्रवादी काँग्रेसच्या सर्व विधानसभा आणि विधानपरिषदेच्या आमदारांची बैठक उद्याच (ता.३१) घेण्याचं निश्चित करण्यात आलं आहे, याचं अधिकृत पत्रही निघालं आहे.
मंत्र्यांच्या संख्येचे बलाबल
५ डिसेंबर २०२४ रोजी देवेंद्र फडणवीस यांनी मुख्यमंत्रिपदाची शपथ घेतली होती. त्यावेळी एकनाथ शिंदे आणि अजित पवार यांनी उपमुख्यमंत्री म्हणून शपथ घेतली होती. त्यानंतर त्याच महिन्यांत मंत्रिमंडळाचा विस्तार करण्यात आला. सध्या भाजपकडे मुख्यमंत्रिपदासह २० मंत्रिपदे आहेत, शिवसेनेकडे (शिंदे गट) एकनाथ शिंदे यांच्यासह १२ मंत्रिपदे आहेत, तर माणिकराव कोकाटे यांची हकालपट्टी आणि अजित पवार यांच्या निधनानंतर राष्ट्रवादी काँग्रेसच्या मंत्र्यांची संख्या आठवर आली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.