भुजबळांची ती भूमिका वैयक्तिक; अजित पवारांनी स्पष्टचं सांगितलं

पुणे : दोन दिवसांपूर्वी राष्ट्रवादीचे आमदार आणि माजी मंत्री छगन भूजबळ यांनी ''फक्त तीन टक्के लोकांना शिकवून आम्हाला शिक्षणापासून दूर ठेवणाऱ्या सरस्वतीची पूजा कशासाठी करायची?” असं वक्तव्य केलं होतं. त्यांंच्या या वक्तव्याबाबत माजी उपमुख्यमंत्री अजित पवार यांना विचारलं असता, हे भुजबळांचं वैयक्तिक मत आहे. ही पक्षाची भूमिका नाही,' असा खुलासा केला आहे. आज पुण्यात एका कार्यक्रमातनंतर बोलताना त्यांनी हे स्पष्टीकरण दिलं आहे.

छगन भुजबळ यांचं ते वैयक्तिक वक्तव्य आहे. असं पक्षाने आधीच सांगितलं आहे. प्रत्येकाला स्वत:ची भूमिका मांडण्याच अधिकार आहे. पण पक्षाने ती भूमिका घेतलेली नाही. त्यांनी त्यांची भूमिका मांडली, असं अजित पवार यांनी स्पष्ट केलं आहे. त्यानंतर, महाविकास आघाडी सरकारच्या काळात आपण मुंडकं खाणारा डायनासॉर होता, अशी टीका अब्दुल सत्तार यांनी केली असल्याचं विचारल्यावर, आपण असल्या फालतू टीकांना मी महत्व देत नाही, अशा शब्दांत सत्तांराची टीकेला धुडावलं आहे.

पीएफआयवर बोलताना ते म्हणाले की, देशात पाकिस्तान जिंदाबादच्या घोषणा देणाऱ्यांवर सक्त कारवाई झाली पाहिजे. भारतात पाकिस्तान जिंदाबाद च्या घोषणा देण्याचा कोणालाही अधिकार नाही. जर तसं झालं असेल तर त्यांच्यावर सक्त कारवाई व्हायला पाहिजे की पुन्हा कोणाची हिंमत नाही झाली पाहिजे अशा घोषणा देण्याची. पण राज्य सरकार केवळ आमचा तपास सुरु आहे, असं म्हणत आहे. पण तपासाला इतका वेळ लावायची काहीच गरज नाही, असंही अजित पवार यांनी म्हटलं आहे.