Shivsena News : निवडणूक आयोगाने गंभीर चूक केली; कायदेतज्ज्ञांचे महत्त्वाचे विधान

Central Election Commission News : केंद्रीय निवडणूक आयोगाने शिवसेना (Shivsena) हे पक्षनाव तसेच धनुष्यबाण हे निवडणूक चिन्ह शिंदे गटाला देण्याचा निर्णय घेतला. निवडणूक आयोगाच्या या निर्णायामुळे उद्धव ठाकरे (Uddhav Thackeray) यांना मोठा धक्का बसला आहे. आयोगाच्या या निकालानंतर आगामी काळात काय-काय गोष्टी बदलणार याबाबत तर्कवितर्क बांधण्यात येत आहेत. या निर्णयावर कायदेतज्ज्ञ उल्हास बापट यांनी मत व्यक्त केले आहे.

केंद्रीय निवडणूक आयोगाने सर्वोच्च न्यायालयाचा निकाल येण्याअगोदर आपला निकाल द्यायला नको होता. आयोगाने मोठी चूक केली आहे, असे मत बापट यांनी व्यक्त केले. ते म्हणाले, आयोगाने दिलेला निर्णय म्हणजे राजकीय भूकंप आहे. निवडणूक आयोगाच्या निर्णयाचे काय परिणाम होणार, या निर्णयाचा फायदा तसेच तोटा किती झाला, हे काळच ठरवेल.

सर्वोच्च न्यायालय आगामी चार ते पाच दिवसांत आमदारांच्या अपात्रतेबाबतच्या खटल्याचा निकाल देऊ शकते. आता या खटल्याची सलग सुनावणी होणार आहे, असेही बापट म्हणाले. सध्याचे पाच सदस्यीय घटनापीठ आमदारांच्या अपात्रतेचा व विधानसभा अध्यक्षांच्या अधिकारांबाबतचा खटला कोणत्याही क्षणी सात सदस्यीय घटनापीठाकडे पाठवण्याचाही निर्णय घेऊ शकते, असेही मत त्यांनी व्यक्त केले.

विद्यमान पाच सदस्यीय घटनापीठाने हे प्रकरण सात न्यायमूर्तींच्या खंडापीठाकडे पाठवण्याचा निर्णय घेतला, तर हा खठला वर्षभर चालेल. मात्र, सध्याच्याच पाच न्यायमूर्तींनी या खटल्यावर निकाल दिला व तो आयोगाने दिलेल्या निकालाच्या विरोधात लागला, तर मग गंभीर परिस्थिती निर्माण होईल. निवडणूक आयोगाने सर्वोच्च न्यायालयाच्या अगोदरच हा निर्णय देऊन गंभीर चूक केली, असे उल्हास बापट म्हणाले.