Pimpri-Chinchwad Crime News: दहा दिवसांत गोळीबार करून दुसरा खून; पिंपरी-चिंचवड हादरलं, कायदा सुव्यवस्थेचा प्रश्न ऐरणीवर

पिंपरी : दहा दिवसांत दुसऱ्यांदा गोळीबार करून खून झाल्याने पिंपरी-चिंचवड पोलीस आय़ुक्तालयातील कायदा सुव्यस्थेचा प्रश्न ऐरणीवर आला आहे.

तळेगाव दाभाडे नगरपरिषदेतील माजी सत्ताधारी जनसेवा विकास समितीचे संस्थापक अध्यक्ष किशोर आवारे यांचा नगरपरिषद कार्यालयाच्या आवारातच १२ मे रोजी भरदिवसा गोळ्या झाडून खून केला होता. तर, आज चिखलीत असाच गोळीबार करून आणखी एक खून झाला.

गेल्या पावणेदोन महिन्यात आयुक्तालय हादरविणारा हा तिसरा खून आहे. त्यातील दोन खून राजकीय व्यक्तींचे आहेत. प्रतिशिर्डी शिरगावचे (ता.मावळ) सरपंच प्रवीण गोपाळे यांचा ग्रामपंचायत निवडणुकीच्या वादातून साई मंदिरासमोर कोयत्याने निर्घृण खून १ एप्रिल रोजी करण्यात आला होता.

त्यानंतर मावळातच गोळ्या झाडत व कोयत्याचे घाव घालत १२ मे रोजी आवारेंचा निर्घूण खून झाला. त्यातून मावळातील कायदा व सुव्यस्थेची स्थिती सावरली नसताना तिसरा खून आणि दहा दिवसांतील दुसरा गोळीबार आयुक्तालयाच्या कार्यक्षेत्रातील चिखलीमध्ये भरदुपारी झाला. त्यातून पोलिसांचा दरारा राहिला आहे की नाही, याविषयी शहरात चर्चा सुरु झाली आहे.

आज दुपारी पावणेदोन वाजता चिखलीच्या गावकमानीजवळ कृष्णा ऊर्फ सोन्या हरिभाऊ तापकीर (वय २०,रा.चिखली) याचा गोळ्या झाडून खून करण्यात आला. त्याचे मित्र सौरभ ऊर्फ सोन्या पानसरे (रा.मोई,ता.खेड,जि.पुणे) आणि सिद्धार्थ कांबळे यांनी गोळीबार केला.

दोघांनी जवळून गोळ्या झाडल्या. त्यात सोन्या ठार झाला. वर्चस्ववाद आणि पूर्ववैमनस्यातून हा खून झाल्याचा अंदाज आहे. मारेकऱ्यांची नावे समजल्याने त्यांच्या शोधासाठी पथके रवाना केल्याचे चिखली पोलीस ठाण्याचे वरिष्ठ पोलीस निरीक्षक ज्ञानेश्वर काटकर यांनी सांगितले.

Edited By : Ganesh Thombare