Eknath Shinde Vs Uddhav Thackeray: '...तर आज उद्धव ठाकरे अन् एकनाथ शिंदे एकत्र असते!'; सरकारमधील मंत्र्याचा सर्वात मोठा गौप्यस्फोट

Pune News: स्थानिक स्वराज्य संस्थांच्या निवडणुकांच्या तारखा जस जसा जवळ येत आहेत. तसं तशा राज्यातील राजकीय घडामोडींना वेग येत आहे. अशातच शिवसेना उद्धव बाळासाहेब ठाकरे पक्षाचे पक्षप्रमुख उद्धव ठाकरे आणि मनसे अध्यक्ष राज ठाकरे यांच्या गाठीभेटी वाढल्याने राजकीय वर्तुळात नवी समीकरणे तयार होणार असल्याचं दिसत आहेत. अशातच उपमुख्यमंत्री एकनाथ शिंदे यांच्या पक्षातील नेते आणि गृहराज्यमंत्री योगेश कदम (Yogesh Kadam) यांनी या घडामोडींवर प्रतिक्रिया दिली आहे.

पुण्यामध्ये आयोजित वार्तालाभ कार्यक्रमांमध्ये बोलताना योगेश कदम म्हणाले, गेले अनेक वर्ष उद्धव ठाकरे आणि राज ठाकरे बोलले देखील नाहीत. मात्र आता ते एकत्र येत आहेत. त्यांची कौटुंबिक दरी देखील वाढली होती त्यानंतर आता फक्त ते मराठी मतांसाठी एकत्र येत आहेत. महापालिकेत त्यांना सत्ता आणायचे आहे. त्यामुळे आपल्यापासून लांब गेलेला मराठी मतदार आपल्याकडे खेचण्यासाठी हे दोन्ही बंधू एकत्र येत असल्याची टीका कदम यांनी केली.

लोकसभा निवडणुकीवेळी दाऊद च्या सोबत हात मिळवणी केलेल्या लोकांनी हिरवे झेंडे नाचवले ते अंगाशी आला असून त्यामुळे मराठी मतदार लांब गेले आहेत. ते परत आणण्याकरता आपण दोघे एकत्र आलो तरच ते शक्य होईल या उद्देशासाठी हे दोघेही बंधू एकत्र येत असल्याचं योगेश कदम म्हणाले.

मात्र, मागील निवडणुकीमध्ये मराठी माणसांनी आम्हाला मतदान केलं आहे. त्यामुळे त्यांचा उद्देश यशस्वी होईल असं वाटत नाही. उद्धव ठाकरे(Uddhav Thackeray) हे मुख्यमंत्री असताना त्यांना मराठी लोकांसाठी चांगले निर्णय घेता आले असते. मुंबईमधील मराठी माणसांचा जो टक्का होता तो घसरला आहे. मुंबईतील मराठी माणूस मुंबई बाहेर फेकला गेला आहे.

मुंबईमध्ये मराठी माणसाला टिकून ठेवण्यासाठी अपॉर्डेबल हाऊसिंग सिस्टीम काढणं आवश्यक होतं. मात्र, त्यांनी तसं केलं नाही. आता एकनाथ शिंदे हे त्या गोष्टी करत आहेत. पंचवीस वर्षे महापालिकेमध्ये उद्धव ठाकरे यांच्या पक्षाची सत्ता होती. मात्र, त्यांनी मराठी माणसासाठी कोणतेही महत्त्वपूर्ण निर्णय घेतले नाहीत. निवडणुकीत पूर्त मराठी भाषेचा प्रपोगंडा तयार करून मतदारांना आकर्षित करण्याचा प्लॅन आहे.मात्र तो यशस्वी होईल असं वाटत नाही.