NCP election strategy : राष्ट्रवादीचा कॉन्फिडन्स वाढला, थेट स्वबळाचा नारा!

Pune News : अनेक दिवसांपासून प्रलंबित असलेले पालकमंत्री पदाचं वाटप नुकतच जाहीर करण्यात आलं आहे. यामध्ये उपमुख्यमंत्री अजित पवार यांच्याकडे बीड सह पुण्याची जबाबदारी देण्यात आली आहे. यानंतर आज अजित पवारांच्या राष्ट्रवादी काँग्रेसने पुण्यात दादा पालकमंत्री झाल्याचा जल्लोष केला. यावेळी राष्ट्रवादीच्या शहराध्यक्षांनी थेट स्वबळाचा नारा दिलाचं पाहायला मिळाले.

पुण्याचे पालकमंत्री पद भाजपकडे राहावे यासाठी गेल्या काही दिवसांपासून भाजपच्या स्थानिक नेत्यांनी वरिष्ठांकडे फिल्डिंग लावली होती. असं असताना देखील पुन्हा एकदा अजित पवारच (Ajit Pawar) पुण्याचे पालकमंत्री बनले आहेत. यानंतर याचा आनंद व्यक्त करण्यासाठी राष्ट्रवादी काँग्रेसचे कार्यकर्ते शहर कार्यालयाच्या इथे जमले होते कार्यकर्त्यांनी अजित पवार पालकमंत्री झाल्याचा आनंद साजरा करत जलेबी वाटप केले.

यानंतर माध्यमांशी बोलताना राष्ट्रवादीचे पुणे शहर अध्यक्ष दीपक मानकर म्हणाले, अजित पवार यांच्याकडे पुण्याचे आणि बीडचे पालकमंत्री पद आलं हे राज्याला आणि राष्ट्रवादीच्या कार्यकर्त्यांना अपेक्षित होतं. पुणे शहराच्या विकासाला गती देण्याचं सामर्थ्य अजित पवार यांच्यामध्ये आहेत. मात्र पुण्याच्या वाहतूक कोंडीबाबत उपाययोजना करावी अशी मागणी अजित पवार यांच्याकडे असणार आहे. आणि अजित पवार नक्की वाहतूक कोंडी मधून पुणेकरांची सुटका करतील असा विश्वास असल्याचे दीपक मानकर (Deepak Mankar) म्हणाले.

दादांनी बीडचे पालकमंत्री पद स्वीकारल्याने पुण्याकडे काही प्रमाणात दुर्लक्ष होणार नाही का ?असं विचारलं असता मानकर म्हणाले, संपूर्ण महाराष्ट्र सांभाळण्याची ताकद अजित पवार यांच्याकडे आहे. त्यामुळे बीड ,पुणे सह आणखीन कोणत्याही जिल्ह्याची जबाबदारी अजित पवारांकडे दिली तरी ते ही जबाबदारी समर्थपणे पार पाडतील असा आम्हाला विश्वास आहे.

दीपक मानकर पुढे म्हणाले, आगामी महापालिका निवडणुकीमध्ये युती होईल अथवा नाही होईल. मात्र आमची देखील पुणे शहरांमध्ये वेगळी अशी ताकद आहे. आणि या दादांच्या ताकदीचा उपयोग आम्हाला आगामी महापालिका निवडणुकीमध्ये झालेला पाहायला मिळेल. तसेच दादा पालकमंत्री झाल्याने त्याचा पॉझिटिव्ह इफेक्ट आगामी महापालिका निवडणुकीवर झाल्याचं पाहायला मिळेल असं मानकर म्हणाले.