Ajit Pawar Interview : महाराष्ट्राचे मुख्यमंत्री व्हायला आवडेल का? अजित पवारांनी दिलं दिलखुलास उत्तर

Pune News : ‘सकाळ माध्यम समूहा’तर्फे आयोजित ‘दिलखुलास दादा’ या मुलाखतीच्या निमित्ताने अजित पवार यांनी आज विविध विषयावर भाष्य केलं. तसेय यावेळी त्यांना महाराष्ट्राचे मुख्यमंत्री व्हायला आवडेल का? असा प्रश्न त्यांना विचारण्यात आला.

या प्रश्नावर अजित पवारांनी दिलखुलास उत्तर दिलं. तसेच यावेळी त्यांनी ''2024 ला काय आताही मुख्यमंत्रीपदावर दावा ठोकायला तयार आहे, असं रोखठोक विधानही केलं.

महाराष्ट्राचे मुख्यमंत्री व्हायला आवडेल का? या प्रश्नाचे उत्तर देताना अजित पवार म्हणाले की, होय 100 टक्के आवडेल. तसेच त्यांना 2024 ला मुख्यमंत्रीपदाचा दावा ठोकणार का? असा प्रश्न विचारण्यात आला. यावर ते म्हणाले,''2024 ला काय आताही मुख्यमंत्रीपदावर दावा ठोकायला तयार आहे'', असं सूचक विधान अजित पवार यांनी केलं.

अजित पवार यांना आणि राष्ट्रवादी काँग्रेसला उपमुख्यमंत्रिपदाचं इतकं आकर्षण का? या प्रश्नावर उत्तर देताना अजित पवार म्हणाले, ''2004 सालीच राष्ट्रवादीचा मुख्यमंत्री झाला असता. 2004 मध्ये राष्ट्रवादीला मुख्यमंत्रीपदाची संधी मिळेल एवढ्या जागांची संख्या जनतेने राष्ट्रवादीला दिली होती. काही निर्णय वरिष्ठ पातळीवर घेतले जातात. पक्षाची शिस्त राहावी, यासाठी वरिष्ठ सांगतील तसं ऐकावं लागतं. 2004 मध्ये आमची काँग्रेससोबत आघाडी होती. 71 जागा आमच्या आल्या होत्या''.

''काँग्रेसच्या लोकांनी मानसिकता केलेली होती की, राष्ट्रवादीला मुख्यमंत्री पद जाईल. मात्र, काय घडामोडी घडल्या माहिती नाही. वरिष्ठ पातळीवरून निरोप आला की आपल्याकडे उपमुख्यमंत्री पद राहणार आहे. त्यावेळी विधिमंडळात आमच्या सदस्यांनी आर आर पाटील हे मुख्यमंत्री म्हणून निवड केली होती. त्यामुळे आर आर पाटील मुख्यमंत्री म्हणून दिसले असते. पण आम्हाला संधी मिळाली नाही", असं अजित पवार म्हणाले.

(Ediited By Ganesh Thombare)