महापालिकेची पोटनिवडणूक ! ती जागा शिवसेनेच्या राठोड यांना देण्यास भाजपचे गांधी इच्छुक
नगर : स्थायि समितीच्या अध्यक्षपदाची निवड झाल्यानंतर महानगरपालिकेच्या प्रभाग नऊमध्ये लवकरच पोट निवडणूक होणार आहे. ही निवडणूक भारतीय जनता पक्षाने न लढण्याचा निर्णय घेत उमेदवार न देता शिवसेनेचे उपनेते (कै.) अनिल राठोड यांचे पूत्र विक्रम राठोड यांना या प्रभागातून नगरसेवक होण्यासाठी पाठिंबा द्यावा. (कै.) अनिल राठोड यांना हीच खरी श्रद्धांजली ठरेल, अशी मागणी भाजपाचे माजी नगरसेवक सुवेंद्र गांधी यांनी भाजपा शहर जिल्हाध्यक्ष महेंद्र गंधे यांच्याकडे पत्रकाद्वारे केली आहे.
सुवेंद्र गांधी यांनी पाठवलेल्या पत्रकात म्हंटले आहे की, गेल्या 40 ते 50 वर्षांपासून दिवंगत अनिल राठोड यांनी हिंदुत्वाचा झेंडा हाती घेत शहरात काम केले होते. त्यांचा राजकीय प्रवास खडतर होता. सर्वसामान्य नागरिकांसाठी ते आयुष्यभर लढले. त्यांच्या अकाली निधनाने निर्माण झालेली पोकळी भरून काढण्यासाठी मोठा निर्णय घेणे आवश्‍यक आहे. यासाठी प्रभाग नऊमधील पोट निवडणुकीसाठी भाजपने उमेदवार देवू नेये, अशी माझी वैयक्तिक मागणी आहे.
माजी केंद्रीयमंत्री दिलीप गांधी व (कै.) अनिल राठोड यांना कोणताही राजकीय वारसा नसतांना स्वतःच्या कर्तृत्वावर शून्यातून विश्व निर्माण केले. दोघांचा राजकीय प्रवास बरोबर सुरू झाला. दिलीप गांधी व अनिल राठोड यांच्यात गेल्या काही वर्षांपासून ताणतणाव व राजकीय वाद होता, तरी दोघांनी भाजपा शिवसेना युतीत बरोबर काम केले होते. खासदार म्हणून निवडून येण्यात अनिल राठोड यांनी सहकार्य केले, तर आमदार म्हणून निवडून येण्यासाठी दिलीप गांधी यांनी एकमेकांना सहकार्य केले आहे. पदांच्या माध्यमातून दोघांनी शहराच्या व जिल्ह्याच्या विकासास हातभार लावत सर्वसामान्य जनतेची कामे केली आहेत. हे विसरून चालणार नाही.
राज्याचे माजी मुख्यमंत्री देवेंद्र फडणवीस यांचे (कै.) अनिल राठोड हे जवळचे स्नेही होते. प्रभाग नऊमध्ये होणाऱ्या पोटनिवडणुकीसाठी भाजपाने उमेदवार न देता विक्रम राठोड यांना पाठिंबा द्यावा, अशी मागणी विरोधीपक्ष नेते देवेंद्र फडणवीस व प्रदेशाध्यक्ष आमदार चंद्रकांत पाटील यांच्या कडेही करणार आहे, असे गांधी यांनी म्हटले आहे.
दरम्यान, नुकतीच महापालिकेच्या स्थायी समितीच्या सभापतीपदाची निवड झाली आहे. हा धुराळा संपतो ना संपतो तोच या पोटनिवडणुकीसाठी राजकारण तापले आहे. त्यामुळे भाजप- शिवसेनेतील गटांतील राजकारण सुरू झाले आहे.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.