पंकज भुजबळांकडून ठाकरेंच्या अभिवादनाचे पोस्टर्स भायखळ्यात, खळबळ उडाली नांदगावात !

नांदगाव : छगन भुजबळ यांच्या राजकीय कारकिर्दीचा प्रारंभ झाला, यशोकळस गाठले ते शिवसेनाप्रमुख बाळासाहेब ठाकरेंच्या शिवसेनेत. आज त्याला उजाळा मिळाला तो भायखळ्यात आमदार पंकज भुजबळ यांच्या शिवसेनाप्रमुख बाळासाहेब ठाकरेंच्या श्रध्दांजलीच्या होर्डींग्जने. त्याची चर्चा सगळीकडे झाली. विशेषतः आमदार पंकज भुजबळांच्या नांदगाव मतदारसंघात त्याचे राजकीय तरंग उमटल्याने तो चर्चेचा विषय ठरला. 

आमदार पंकज भुजबळ यांनी दिवंगत शिवसेनाप्रमुख बाळासाहेब ठाकरे यांच्या सहाव्या स्मृती दिनानिमित्त भायखळा, माझगाव परिसरात फलक लावले. त्याने नांदगाव विधानसभा मतदार संघातील राजकीय वर्तुळात खळबळ उडाली. दिवंगत बाळासाहेब ठाकरेंना अभिवादन करण्यासाठी दुमत असू शकत नाही. मात्र ते स्वतःच्या नांदगाव, छगन भुजबळ यांच्या येवला या दोन ठिकाणाऐवजी छगन भुजबळांचा मूळ मतदारसंघ असलेल्या माझगावमध्ये फलक झळकले. त्यामुळे हे पोस्टर्स राजकीय वर्तुळात चर्चेचा विषय बनले. 

गेल्या तीन टर्मपासून हे दोन्ही नेते या मतदारसंघाचे प्रतिनिधीत्व करीत आहेत. त्यांची राजकीय कारकिर्द येथे बहरली व स्थिरावली आहे. भायखळ्यात सध्या एमआयएमचे वारीस पठाण आमदार आहेत. "एमआयएम' हा शिवसेनेसह सर्वच राजकीय पक्षांचा समान शत्रु आहे. भाजपचे मधू चव्हाणांना दुसऱ्या क्रमांकाची मते आहेत. त्यामुळे कदाचित विधानसभेसाठीची चाचपणी म्हणून त्याकडे पाहिले जाते का? याची उत्सुकता निर्माण झाली आहे. 

मला माहित नाही- पंकज भुजबळ 
बाळासाहेब ठाकरे मोठे नेते आहेत. त्यांच्याविषयी मला आहे तसा सगळ्यांनाच आदर आहे. मात्र पोस्टर्स विषयी मला माहिती नाही असे आमदार पंकज भुजबळ यांनी सांगितले. 
पोस्टर लावण्यात वावगे काय ? 
शिवसेनाप्रमुख बाळासाहेब ठाकरे यांच्याशी आमचे प्रदीर्घ स्नेहाचे संबंध होते. पंकजसह आमचे सबंध कुटुंबांचा त्यांच्याशी संबंध आला आहे. त्यांच्याविषयी आदर आहेच. त्यामुळे अभिवादन करणारे पोस्टर्स लागले तर त्यात वावगे काय? असे प्रतिपादन राष्ट्रवादी कॉंग्रेसचे ज्येष्ठ नेते छगन भुजबळ यांनी केले.