'मन की बात' जाहीर करायची नसते :  अशोक चव्हाण

औरंगाबाद :  " लोकसभेची निवडणूक लढवायची का विधानसभेची? याबाबत अद्याप निर्णय झालेला नाही. योग्य वेळी योग्य निर्णय घेऊ. 'मन की बात' जाहीर करायची नसते. पक्ष सांगेल तो निर्णय घ्यावा लागेल,"कॉंग्रेसचे प्रदेशाध्यक्ष अशोक चव्हाण यांनी शनिवारी सांगितले. 

" हिंगोली लोकसभा मतदारसंघातून राजीव सातव यांनी निवडणूक लढविण्यास नकार दिल्याचे आपल्याला माहीत नाही. मात्र माझ्या शेजारचा मतदारसंघ असल्याने काळजी घेऊ. औरंगाबादेतून अनेक जण तयारी करत आहेत, मला नांदेडकरांनी नाकारलेले नाही, त्यामुळे औरंगाबादमध्ये येण्याचा प्रश्‍नच नाही," असेही श्री. चव्हाण म्हणाले . 

आगामी लोकसभा-विधानसभा निवडणुकीच्या तयारीसंदर्भात विचारलेल्या प्रश्‍नावर श्री. चव्हाण म्हणाले, " सध्या कॉंग्रेसची जनसंघर्ष यात्रा सुरू आहे. त्यातून उमेदवारांची पडताळणी केली जात आहे. अद्याप कुठलेही उमेदवार ठरलेले नाहीत. "

शिवसेना आणि एमआयएम पक्ष एकसारखेच आहेत. त्यामुळे एमआयएमसोबच चर्चा करण्याचा प्रश्‍नच नाही, असे श्री. चव्हाण यांनी नमूद केले.