बंडा तात्यांना अटक करून सरकारने काय साधले?

पुणे :  कोरोनाच्या पार्श्वभूमीवर राज्य सरकारनं पायी वारीला परवानगी नाकारली आहे. पायी वारी करण्यावर ठाम असलेल्या बंडा तात्या कराडकर Banda Tatya Karadkar यांना पोलिसांनी ताब्यात घेतल्यानंतर आता राजकारण तापू लागलं आहे. विरोधी पक्षनेते देवेंद्र फडणवीस यांनी महाविकास आघाडी सरकारवर निशाणा साधला आहे. याबाबत टि्वट करीत फडणवीस यांनी सरकारचा निषेध केला आहे. Devendra Fadnavis criticizes Thackeray government over Banda Tatya Karadkar

वारी हा महाराष्ट्राच्या संस्कृतीचा अविभाज्य घटक असून विठ्ठल-वारकरी यांचे नाते अवर्णनीय आहे. श्रद्धा-परंपरांचे महत्त्व आहेच! बंडातात्या कराडकर यांना अटक करून सरकारने काय साधले? काहीच मध्यम मार्ग नव्हता? वारकर्‍यांचा असा अपमान? थेट अटकेची कारवाई ही सर्वथा चुकीची आहे, असे टि्वट फडणवीस यांनी केलं आहे. 

बंडा तात्या कराडकर यांना पोलिसांनी ताब्यात घेतल्यानंतर च-होली येथील संकल्प गार्डन येथे सुरु असलेले आंदोलन स्थगित करण्यात आले. बंडा तात्या कराडकर यांना फलटण येथील त्यांच्या गुरुकुलमध्ये पाठविण्यात आल्याचे समजते. ''बंडा तात्यांच्या सूचनेनंतर आम्ही हे आंदोलन स्थगित करीत आहोत," असे आंदोलन करणाऱ्या वारकऱ्यांनी सांगितले.  
 
यंदाही राज्य सरकारने कोरोनाच्या पार्श्वभूमीवर पायी वारीला परवानगी नाकारली आहे. हा निर्णय मान्य नसलेल्या वारकरी संप्रदायाचे बंडा तात्या कराडकर यांना आणि त्यांच्या समर्थकांना पोलिसांनी आज पहाटे पाच वाजण्याच्या सुमारास ताब्यात घेतलं होतं.  त्यांना अज्ञास्थळी हलविण्यात आले होतं. आमदार महेश लांडगे यांनी याबाबत पोलिस प्रशासनाशी चर्चा केली होती.  

बंडातात्या कराडकरांना  सकाळी ताब्यात घेतल्यानंतर च-होली येथील संकल्प मंगल कार्यालयात पोलिसांच्या नजरकैदमध्ये ठेवण्यात आले होते. समूहाने न जाता टप्याटप्याने वारकरी पंढरपूरकडे पायी जातील, असं काल बंडातात्या कराडकर यांनी जाहीर केलं होतं. त्यानुसार, आज पहाटे पाच वाजताच्या सुमारास काही वारकऱ्यांनी पायी चालायला सुरुवात केली. तेव्हा पोलिसांनी त्यांना अडवलं आणि या सर्वांना सोडविण्यासाठी कराडकर तिथं पोहचले. मग मात्र पोलिसांनी त्यांनाही ताब्यात घेतलं होतं. बंडा तात्या कराडकर यांना ताब्यात घेतल्यानंतर वारकऱ्यांनी संकल्प गार्डन येथे भजन आंदोलन सुरू केलं होते.  
 Edited by : Mangesh Mahale