काँग्रेसच्या चिन्हावर राष्ट्रवादीच्या एकमेव उमेदवाराचा विजय...

मुंबई : गुजरातमधील सहा महापालिका निवडणुकांचे निकाल मंगळवारी जाहीर झाले. भाजपने सहाही महापालिकांत बहुमत मिळवले असून काँग्रेसचा सुपडा साफ झाला आहे. सुरतमध्ये काँग्रेसला खातेही खोलता आले नाही. तर अहमदाबाद महापालिकेत केवळ २५ उमेदवार विजयी झाले आहेत. त्यामध्ये गुजरातमधील राष्ट्रवादी काँग्रेसचा एक उमेदवारही विजयी झाला आहे. 

गुजरातमधील अहमदाबाद, सुरत, वडोदरा, राजकोट, जामनगर आणि भावनगर या महापालिकांच्या निवडणुकीची मतमोजणी मंगळवारी झाली. भाजपने ५७६ पैकी ४८३ ठिकाणी विजय मिळविला आहे. तर काँग्रेसला जेमतेम ५५ जागा मिळाल्या आहेत. 

राष्ट्रवादी काँग्रेसचे नकुल सिंग तोमर यांनी अहमदाबाद मधील कुबेरनगर वॉर्डातून काँग्रेसच्या चिन्हावर निवडणूक लढविली होती. या निवडणुकीत ते विजयी झाले आहेत. खासदार सुप्रिया सुळे व राष्ट्रवादी काँग्रेसचे नेते प्रफुल्ल पटेल यांनी ट्विट करून तोमर यांना विजयाबद्दल शुभेच्छा दिल्या आहेत.

सहाही महापालिकांमध्ये भाजपने मोठी विजय मिळविला आहे. मागील निवडणुकीच्या तुलनेत यावेळी भाजपला अभुतपूर्व असेच यश मिळाले आहे. २०१५ च्या निवडणुकीच्या तुलनेत यावेळी उमेदवारांचा आकडा १५ टक्क्यांनी वाढला आहे. अहमदाबादमध्ये १९२ पैकी १५९, राजकोटमध्ये ७२ पैकी ६८, जामनगरमध्ये ६४ पैकी ५०, भावनगरमध्ये ५२ पैकी ४४, वडोदरामध्ये ७६ पैकी ६९ तर सुरतमध्ये १२० पैकी ९३ जागांवर भाजपचे उमेदवार विजयी झाले आहेत. 

काँग्रेसला सुरत महापालिकेत खातेही खोलता आले नाही. तर अहमदाबादमध्ये केवळ २५ जागा मिळाल्या. राजकोटमध्ये चार, जामनगरमध्ये ११, भावनगरमध्ये आठ आणि वडोदरामध्ये सात जागांवर काँग्रेसने विजय मिळविला आहे. आपने सुरत महापालिकेत २७ जागा जिंकून धक्कादायक निकाल नोंदविला. तर असदुद्दीन ओवैसी यांच्या एआयएमआयएमने अहमदाबाद महापालिकेत सात जागा जिंकल्या आहेत. या जागा पूर्वी काँग्रेसच्या ताब्यात होत्या.