मुस्लिमांसाठी हॉटेलांत "हलाल'चे फलक लावा

मुंबई :  "हलाल' पद्धतीचे मांसाहारी खाद्यपदार्थ हॉटेलमध्ये असल्याचे फलक लावावेत, अशी मागणी समाजवादी पक्षाचे गटनेते रईस शेख यांनी महापालिका आयुक्त अजोय मेहता यांच्याकडे केली आहे. 

 मुस्लिमधर्मीयांमध्ये "हलाल' पद्धतीचा अवलंब करून कत्तल केलेल्या प्राण्यांच्या मांसापासून बनवलेले पदार्थ सेवन केले जातात. असे पदार्थ सर्व हॉटेल आणि रेस्टॉरंटमध्ये उपलब्ध नसतात. 

या मागणीला राजकीय पक्ष आणि धार्मिक संस्थांकडून विरोध होण्याची शक्‍यता वर्तवली जात आहे. 

मुंबईतील कोणत्या नागरिकांनी मांसाहार करावा किंवा शाकाहार करावा, काय खावे किंवा काय खाऊ नये, कोणत्या हॉटेलचालकाने "हलाल' खाद्यपदार्थांची विक्री करावी किंवा करू नये याला माझा आक्षेप नाही, असे त्यांनी स्पष्ट केले. 

इस्लाममधील तत्त्वांनुसार विशिष्ट पद्धतीने प्राण्यांची कत्तल केली जाते. त्याला "हलाल' असे म्हटले जाते. "हलाल' पद्धतीने कत्तल केलेल्या प्राण्यांच्या मांसाचे सेवन करणे, हे मुस्लिमांसाठी अनिर्वाय आहे.

परंतु, मुंबईतील अनेक हॉटेल आणि रेस्टॉरंटमध्ये "हलाल' पद्धतीचा अवलंब करून मांसाहारी खाद्यपदार्थ तयार केले आहेत किंवा नाहीत, याची शंका मुस्लिमांना असते. त्यामुळे अनेक वेळा मुस्लिम नागरिक हॉटेलमध्ये जाऊन मांसाहारी पदार्थ खाण्याचे टाळतात, असे रईस शेख म्हणाले. 

अन्य देशांत पद्धत 
आंतरराष्ट्रीय स्तरावर हॉटेलात "हलाल' पद्धतीचे मांस असल्याचे फलक लावले जातात. त्याच धर्तीवर महापालिका आणि राज्य सरकारच्या आस्थापनेवरील हॉटेलांत मांसाहारी खाद्यपदार्थ "हलाल' पद्धतीचे आहेत किंवा नाहीत याची माहिती देणारे फलक लावावेत, अशी मागणी महापालिका आयुक्त, तसेच अन्न व औषधी द्रव्य प्रशासनाकडे केली आहे, अशी माहिती रईस शेख यांनी दिली.