फडणविसांच्या महत्त्वाकांक्षी प्रकल्पावर अजितदादांची कात्री!

पुणे : हायपर लूप प्रकल्प जगात कोठेही झालेला नाही. आधी जगात इतरत्र कुठे तरी होऊ द्या, किमान दहा किलोमीटर तरी होऊ द्या. तो यशस्वी झाल्यावर मग आपण त्याचा विचार करू, असे सांगत उपमुख्यमंत्री अजित पवार यांनी हायपर लूप प्रकल्प होणार नसल्याचे संकेत दिले.

पवार म्हणाले, हायपर लूप प्रकल्प जगात अद्याप कोठेही झालेले नाही त्यामुळे तसेच या प्रकल्पाची ट्रायल घेण्याची आपली क्षमता नाही. पुणे- मुंबईकरांची गरज असल्यास त्याबाबत विचार करण्यात येईल. पुणे-मुंबई दरम्यान घाटात वाहतूक सुरळीत करण्यासाठी बोगदा काढण्याचे काम सुरू करण्यात आले आहे. हा बोगदा वाहतुकीसाठी सुरू झाल्यास पुणे-मुंबई वाहतूक आणखी सुरळीत होईल.

पीएमआरडीए अंतर्गत मेट्रो हडपसरऐवजी कदमवाकवस्ती पर्यंत तसेच स्वारगेट ते हडपसर मेट्रो मार्ग सुरू करण्याबाबत अधिकाऱ्यांना सूचना देण्यात आल्या आहेत. त्याबाबत अहवाल तयार करून कॅबिनेटमध्ये मंजुरीसाठी ठेवण्यात येईल, अशी माहिती उपमुख्यमंत्री अजित पवार यांनी शुक्रवारी पत्रकार परिषदेत दिली.

उपमुख्यमंत्री तथा पालकमंत्री पवार यांनी व्हीव्हीआयपी सर्किट हाऊस येथे आज मेट्रो प्रकल्प, तीर्थक्षेत्र विकास आराखडा, एचसीएमटीआर मार्ग आदी विषयांवर आढावा घेतला. या बैठकीनंतर पवार यांनी पत्रकारांशी संवाद साधला. या वेळी पवार म्हणाले, स्वारगेट ते हडपसर मेट्रो होणे गरजेचे आहे. स्वारगेट ते कात्रज हा मार्ग भूमिका राहणार असून, पिंपरी ते निगडी हा रेल्वे मार्ग एलिव्हेटेड असेल. कात्रज भागात कात्रज भागात नागरीकरण वाढत आहे. त्यामुळे मेट्रो कात्रजपर्यंत नेण्याची आमची तयारी आहे.