लडाख प्रांतात सीमेवर बोफोर्स तैनात? चीनला रोखण्यासाठी भारताची तयारी

नवी दिल्ली : लडाख प्रांतात चीनने केलेल्या घुसखोरीनंतर भारताने आता चिनी सैन्याला रोखण्यासाठी प्रत्यक्ष नियंत्रण रेषेवर बोफोर्स तोफा नेण्यास सुरुवात केल्याची बातमी एका वृत्तवाहिनीने दिली आहे. या ठिकाणी सैन्याच्या हालचालींसाठी रस्ते व पूल बांधण्याचे कामही वेगाने सुरु करण्यात आले असून विमाने उतरवण्यासाठी धावपट्टीही तयार करण्यात येत असल्याचे या वृत्तात म्हटले आहे. 

चीन भारतीय हद्दीत घुसखोरी करत असल्याचा आरोप अमेरिकेने नुकताच केला होता. दरम्यान पूर्व लडाख भागात चिनी सैन्य मोठ्या प्रमाणावर घुसले असल्याची कबूली संरक्षणमंत्री राजनाथसिंह यांनीही दिली आहे. गेल्या महिन्यापासून उत्तर सिक्कीम व लडाख भागात घुसखोरीच्या मुद्द्यावरुन भारत व चीन यांचे संबंध ताणले गेले आहेत. दरम्यान, या मुद्यावरुन दोन्ही देशांच्या अधिकाऱ्यांमध्ये सहा जूनला चर्चा होणार आहे. हा भाग आपला असल्याचा चीनने दावा केला आहे. त्यामुळे चीनच्या सैनिकांनी मोठ्या संख्येने तेथे घुसखोरी केली आहे. याबाबत भारताने आवश्यक ती पावले उचलली आहेत, असेही राजनाथसिंह यांनी स्पष्ट केले आहे.