नवी दिल्ली : पश्चिम बंगालमध्ये तृणमूल काँग्रेसच्या हातून सत्ता खेचून आणण्यासाठी भाजपकडून रणनीती आखली जात आहे. मुख्यमंत्री ममता बॅनर्जी यांचा पराभव करण्यासाठी भाजपने उमेदवार देतानाही डावपेच टाकले आहेत. आज जाहीर करण्यात आलेल्या उमेदवारांच्या यादीत एक केंद्रीय मंत्री व खासदारालाही तिकीट देण्यात आले आहे.
तृणमूल काँग्रेसने काही दिवसांपूर्वीच सर्व उमेदवारांची नावे जाहीर केली आहेत. भाजपकडून टप्प्याटप्याने उमेदवारांची नावे घोषित केली जात आहेत. पक्षाचे राष्ट्रीय सचिव अरूण सिंह यांनी आज बंगालमधील तिसऱ्या आणि चौथ्या टप्प्यातील अनुक्रमे २७ व ३६ उमेदवारांची यादी प्रसिध्द केली आहे. त्यामध्ये केंद्रीय राज्यमंत्री बाबूल सुप्रियो यांना टॉलीगंज मतदारसंघातून उमेदवारी देण्यात आली आहे.
तसेच खासदार लॉकेट चॅटर्जी, स्वपन दासगुप्ता आणि निशित प्रमाणिक यांना निवडणुकीच्या रिंगणात उतरविण्यात आले आहे. बाबूल सुप्रियो हे पर्यावरण राज्यमंत्री आहे. ते गायक म्हणूनही प्रसिध्द असून बंगालमधील चित्रपटसृष्टीसाठी महत्वाचे ठिकाणी असलेल्या टॉलीगंज मतदारसंघातूनच त्यांना तिकीट देण्यात आले आहे.
चॅटर्जी याही अभिनेत्री असून त्यांना चुंचुरा मतदासंघातून तर स्वपन दासगुप्ता यांना तारकेश्वर आणि प्रमाणिक यांना दिनहाता मतदारसंघातून उतरविण्यात आले आहे. तृणमूलमधून भाजपात आलेले राजीव बॅनर्जी यांना डोमजुर मतदारसंघातून उमेदवारी मिळाली आहे. तसेच अभिनेता यश दासगुप्ता यालाही तिकीट देण्यात आले आहे. अर्थतज्ज्ञ अशोक लाहिरी यांनाही निवडणूक रिंगणात उतरवण्यात आले आहे.
भाजपकडून आज तमिळनाडूतील १७ उमेदवारांची यादी जाहीर केली आहे. त्यामध्ये अभिनेत्री खुशबू सुंदर यांनाही उमेदवारी मिळाली आहे. आसाममधील १७ उमेदवारांची यादीही आज जाहीर करण्यात आली. तर केरळमधील ११२ उमेदवारांची यादी पक्षाकडून प्रसिध्द करण्यात आली आहे.
दरम्यान, ममता बॅनर्जी यांनी आज व्हीलचेअरवर बसून रोड शोमध्ये सहभाग घेतला. यावेळी त्यांनी जखमी असले तरी निर्भिडपणे लढणार असल्याचा इशारा दिला. जखमी वाघ अधिक आक्रमक होतो, अशा शब्दांत त्यांनी विरोधकांना आव्हान दिले.
Edited By Rajanand More
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.