गरीब, गरजू मराठा समाजाला न्याय मिळाला पाहिजे, ही राज ठाकरेंची भूमिका..

मुंबई : मराठा समाजाला आरक्षण मिळावे, यासाठी मराठा समाज, राज्यातील सर्वपक्षीय नेत्यांची भेट खासदार संभाजीराजे संभाजीराजे Sambhaji Raje घेत आहेत. आज सकाळी साडेनऊ वाजता त्यांनी राष्ट्रवादी कॅाग्रेसचे अध्यक्ष शरद पवार यांची भेट घेतली. त्यानंतर त्यांनी महाराष्ट्र नवनिर्माण सेनेचे अध्यक्ष राज ठाकरे यांची भेट घेतली. संभाजीराजेंनी राज ठाकरे यांची त्यांच्या कृष्णकुंज निवासस्थानी भेट घेतली. Sambhaji Raje discussion with Raj Thackeray to get justice for the Maratha community

राज ठाकरे यांची भेट घेतल्यानंतर माध्यमांशी बोलताना संभाजीराजे म्हणाले की, राज ठाकरे जात पात मानत नाहीत. त्यांची विचार करण्याची पद्धत वेगळी आहे. पण गरीब आणि गरजू मराठा समाजाला न्याय मिळाला पाहिजे, ही त्यांची भूमिका आहे. राज ठाकरे यांचे आजोबा आणि माझें आजोबा यांचे असणारे सबंध शिवाय गडकिल्ल्यांचं संवर्धन यावरही आम्ही चर्चा केली. मराठा आरक्षणाला स्थगिती मिळाली आहे पण त्यातून आता मार्ग कसा काढायचा आणि समाजाला न्याय कसा मिळायला हवा यावर चर्चा झाली.

सर्वोच्च न्यायालयाने मराठा आरक्षण रद्द केले आहे. त्यामुळे मराठा समाजात नाराजी आहे. मराठा समाजाची भावना जाणून घेण्यासाठी खासदार संभाजीराजे राज्याच्या दैाऱ्यावर आहेत. या दैाऱ्यात ते विविध पक्षांचे नेते, मराठा समाजातील पदाधिकारी, कार्यक्रर्ते यांच्या भेटी घेणार आहेत. त्यांनी आज राष्ट्रवादी कॅाग्रेसचे अध्यक्ष शरद पवार यांची भेट घेतली. राज्यभर दौरा करुन मराठा समाजाचे म्हणणं, त्यांची परिस्थिती जाणून घेत आहेत.   

मुंबई येथे सिल्वर ओक येथे शरद पवार यांच्या निवासस्थानी सकाळी साडेनऊ वाजता  संभाजीराजेंनी भेट घेतली. दोन्ही नेत्यांमध्ये मराठा आरक्षणाबाबत सुमारे बारा ते पंधरा मिनिटे चर्चा झाली. मराठा आरक्षणप्रश्नी सर्वपक्षांनी पुढाकार घेण्याची गरज असल्याचे शरद पवारांना सांगितल्याचे संभाजीराजेंनी माध्यमांशी बोलताना सांगितले. उद्या संभाजीराजे हे मुख्यमंत्री उद्धव ठाकरे, विरोधी पक्षनेते देवेंद्र फडणवीस यांच्यासोबत या विषयावर चर्चा करणार आहेत. वंचित बहुजन आघाडीचे राष्ट्रीय अध्यक्ष प्रकाश आंबेडकर यांना ते उद्या सांयकाळी ४ वाजता पुण्यात भेटणार आहेत.  
संभाजीराजे म्हणाले, "मराठा समाजाची खदखद, त्यांची परिस्थिती शरद पवारांच्या कानावर घातली. या प्रश्नी तुम्ही पुढाकार घेण्याची गरज असल्याचं त्यांना सांगितलं. तीन-चार दिवस मी महाराष्ट्राचा दौरा केला. मराठा समाज किती अस्वस्थ आहे, किती दु:खी आहे, हे शरद पवारांना सांगितलं. मुख्यमंत्री, विरोधी पक्षनेते, नारायण राणे या सगळ्यांनी एकत्र येऊन मराठा समाजाला न्याय मिळवून देण्याची भूमिका घ्यायला हवी. त्यांनी सगळं ऐकून घेतलं आणि सकारात्मक दृष्टीकोन दाखवला.   

राजकीय नेत्यांच्या भेटीनंतर संभाजीराजे मराठा आरक्षणाबाबत पुढे काय करायचं, याबद्दल आपली भूमिका मांडणार आहे. त्यामुळे या भेटींकडे संपूर्ण मराठा समाजाचे लक्ष लागले आहे.मराठा आरक्षण रद्द केल्यानंतर रस्त्यावर येऊन मोर्चा, आंदोलन करण्याचा इशारा काही मराठा संघटनांनी दिला आहे. परंतु सध्या कोरोनाची परिस्थिती पाहता आंदोलन, मोर्चे टाळण्याचं आवाहन संभाजीराजेंनी केलं आहे.