1 डिसेंबरला शिवतिर्थावर उद्धव ठाकरेंचा शपथविधी: शरद पवार

पुणे: महाराष्ट्र विकास आघाडीच्या विधीमंडळ पक्षाचे नेते उद्धव ठाकरे यांचा मुख्यमंत्री म्हणून शपथविधी 1 डिसेंबर रोजी सायंकाळी 5 वाजता शिवतिर्थावर होईल, अशी माहिती राष्ट्रवादीचे
अध्यक्ष शरद पवार यांनी दिली. 

आज दुपारी मुख्यमंत्री देवेंद्र फडणवीस यांनी राजीनामा दिल्यानंतर सरकार स्थापनेसाठी शिवसेना- काँग्रेस- राष्ट्रवादीच्या आमदारांची बैठक रात्री मुंबईत झाली. या बैठकीत आघाडीचे मुख्यमंत्री म्हणून उद्धव ठाकरे यांची निवड झाली. त्यानंतर बोलताना पवार म्हणाले, आपण सर्वांनी उद्धव ठाकरे यांची कर्णधारपदी निवड केली आहे. आता बैठक संपल्यावर तिन्ही पक्षाचे नेते राज्यपालांकडे जावून सत्तास्थापनेचा दावा करतील. त्यानंतर राज्यपाल उद्धव यांना सत्तास्थापनेचे निमंत्रण देतील. उद्धव यांचा शपथविधी 1 डिसेंबर रोजी सायंकाळी 5 वाजता शिवतिर्थावर होईल. हा सोहळा ऐतिहासिक होईल, असा विश्वासही पवार यांनी व्यक्त केला.