अपक्ष आमदार देवेंद्र भुयार यांचा साखरपुडा , भावी पत्नी आहे डाॅक्टर!

अमरावती : विधान परिषद आणि राज्यसभा निवडणुकीत आपल्या एका मताच्या जोरावर संजय राऊतांना भिडणारे आणि अजितदादा सांगतील ती पूर्व दिशा असे ठणकावून सांगणारे (Amravati) अमरावती जिल्ह्यातील वरुड मोर्शी मतदारसंघाचे अपक्ष आमदार देवेंद्र भुयार (Devendra Bhuyar) यांचा साखरपुडा झाला आहे. त्यांच्या भावी पत्नी या डाॅक्टर असून लवकरच हे दोघेही बोहल्यावर चढणार आहेत. जिल्हा परिषद सदस्य ते अपक्ष आमदार अशी राजकीय झेप घेणारे भुयार सध्याच्या राजकीय धुळवडीपासून दूर आहेत.

साखरपुरडा झाल्यानंतर ते आता विधानसभेत ठाकरे सरकारला पाठिंबा देण्यासाठी तीस जून रोजी उपस्थित राहणार का, याची उत्सुकता आहे. भाजपचे नेते अनिल बोंडे यांचा 2019 च्या निवडणुकीत पराभव केल्यानंतर भुयार राज्यात चर्चेत आले होते.

अपक्ष आमदार देवेंद्र भुयार हे राज्यसभा निवडणुकीत शिवसेनेच्या दुसऱ्या उमेदवाराचा पराभव झाल्यानंतर चांगलेच चर्चेत आले होते. (Vidharbha) शिवसेनेच्या संजय पवार यांचा पराभव होऊन भाजपचे तिसरे उमेदवार धनंजय महाडिक हे आश्चर्यकारकरित्या विजयी झाले होते. या पराभवाने शिवसेना चांगलीच संतापली होती.

तेव्हा संजय राऊत यांनी अपक्ष आमदारांवर नाव घेऊन दगाबाजीचा आरोप केला होता, त्यात देवेंद्र भुयार यांचे देखील नाव होते. तेच आमदार देवेंद्र भूयार यांचा आज साखरपुडा संपन्न झाला. अमरावती जिल्ह्यातील दर्यापूर तालुक्यातील कळाशी येथील मोनिका राणे यांच्याशी आज नातेवाईक, आप्तेशष्ठांच्या उपस्थितीत मोठ्या उत्साहात साखरपुडा संपन्न झाला.

देवेंद्र भुयार यांच्या भावी पत्नी मोनिका यांचे वैद्यकीय शिक्षण पूर्ण झालेले आहे. आता आमदार देवेंद्र भूयार लवकरच विवाहबंधनात अडकणार आहेत.