Mahayuti : महायुतीसाठी विधानसभा निवडणूक प्रतिष्ठेची; खासदार, विधानपरिषदेच्या 'या' आमदारांना उतरवले रिंगणात

Mumbai News : विधानसभा निवडणुकीसाठी उमेदवारी अर्ज दाखल करण्याची मुदत मंगळवारी संपली. त्यानंतर महाविकास आघाडी आणि महायुतीतील जागावाटपाचा पेच अजूनही कायम असल्याचे पुढे आले आहे. यातून पक्षांतर्गत वाद, मित्रपक्षांतील कलह वारंवार समोर येत आहेत.

राज्यात विविध ठिकाणी मित्रपक्षांचे उमेदवारच एकमेकांसमोर उभे ठाकले आहेत. तर दुसरीकडे महायुतीमधील मित्रपक्षाने खासदार व विधानपरिषदेच्या सदस्यांना निवडणूक रिंगणात उतरवीत ही निवडणूक प्रतिष्ठेची केली आहे.

भाजपने या मध्ये आघाडी घेतली आहे. प्रदेशाध्यक्ष चंद्रशेखर बावनकुळे हे विधानपरिषदेचे सदस्य असताना त्यांना विदर्भातील कामठी मतदारसंघातून संधी देण्यात आली आहे तर दुसरीकडे माजी मंत्री राम शिंदे (Ram Shinde) हे विधानपरिषदेचे सदस्य असताना त्यांना ही कर्जत जामखेड मतदारसंघातून उमेदवारी देण्यात आली आहे. त्यांची लढत आमदार रोहित पवारविरुद्ध होत आहे.

शिवसेनेने नुकतेच राज्यसभेवर खासदार म्हणून निवडून गेलेल्या मिलिंद देवरा यांना पुन्हा एकदा विधानसभा निवडणुकीच्या रिंगणात उतरवले आहे. त्यांना वरळी मतदारसंघातून माजी मंत्री आदित्य ठाकरे यांच्या विरोधात उतरविण्यात आले आहे, तर दुसरीकडे रिसोड मतदारसंघातून नुकत्याच विधानपरिषदेवर निवडून आलेल्या भावना गवळी यांना या ठिकाणाहून संधी देण्यात आली आहे. त्यामुळे सर्वांचे लक्ष या ठिकाणच्या निवडणुकीकडे लागले आहे.

महायुतीमधील घटक पक्ष असलेल्या राष्ट्रवादी काँग्रेसकडून परभणी जिल्ह्यातील पाथरी मतदारसंघातून नुकतेच विधान परिषदेवर निवडून गेलेल्या राजेश विटेकर यांना पुन्हा एकदा निवडणूक रिंगणात उतरवले आहे. या मतदार संघातून सुरुवातीला राजेश विटेकर यांच्या मातोश्री निर्मला विटेकर यांना संधी देण्यात आली होती. त्याठिकाणी उमेदवार बदलून राजेश विटेकर यांना निवडणूक रिंगणात उतरविण्यात आले आहे.

विधानसभा निवडणुकीच्या रिंगणात भाजपने दोन जणांना तर शिवसेनेने दोन जणांना तर राष्ट्रवादी काँग्रेसने एक अशा पाच जणांना संधी देण्यात आली आहे. त्यामुळे या ठिकाणी होत असलेल्या या निवडणुकीकडे सर्वांचे लक्ष लागले आहे.