...तर अजितदादांनी सगळी शिवसेना खाऊन टाकली असती : रामदास कदमांचा आरोप

मुंबई : मुख्यमंत्री एकनाथ शिंदे (Eknath Shinde) यांनी जर बंडाचे पाऊल उचलले नसते तर पुढच्या विधानसभेच्या निवडणुकीत शिवसेनेचे (shivsena) पाच आमदारही निवडून आले नसते. सगळं संपलं असतं. उलट एकनाथ शिंदे यांचे मी आभार मानेन, त्यांना धन्यवाद देईन, कारण त्यांनी बाळासाहेबांची (Balasaheb Thackeray) शिवसेना जिवंत ठेवली. नाही तर अजितदादांनी (Ajit Pawar) पुढच्या अडीच वर्षांत सगळी शिवसेना खाऊन टाकली असती. काहीही शिल्लक राहिलं नसतं, असा दावा माजी मंत्री रामदास कदम (Ramdas Kadam) यांनी केला आहे. (Ramdas Kadam criticizes Uddhav Thackeray, Ajit Pawar)

आगामी दसरा मेळाव्याच्या पार्श्वभूमीवर एका मराठी वृत्तवाहिनीशी बोलताना रामदास कदम यांनी शिवसेना पक्षप्रमुख उद्धव ठाकरे यांच्यासह अजित पवार यांच्यावर हल्लाबोल केला. त्यावेळी त्यांनी शिंदे बंड केले नसते तर अजित पवारांनी सर्व शिवसेना संपवली असते, असे खळबळजनक विधान केले आहे.

उद्धवसाहेब, ज्या दिवशी तुम्ही काँग्रेस आणि राष्ट्रवादी काँग्रेस यांच्यासोबत जाऊन मुख्यमंत्री झालात, त्याच दिवशी तुमचा आणि बाळासाहेब ठाकरे यांचा विषय संपला ना. आता बाळासाहेबांचं नाव उद्धव ठाकरे कसे घेऊ शकतात. ज्या राष्ट्रवादी आणि काँग्रेसच्या विरोधात बाळासाहेबांनी उभं आयुष्य संघर्ष केला, त्याच शरद पवारांच्या मांडीवर तुम्ही जाऊन बसलात. त्यामुळे तुम्हाला बाळासाहेबांची शिवसेना कशी म्हणता येईल. त्यामुळे शिवाजी पार्कवर जाऊन बाळासाहेबांचं नाव घेण्याचा उद्धव ठाकरेंना अधिकार नाही, सडेतोड बोल माजी मंत्री रामदास कदम यांनी शिवसेना पक्षप्रमुख उद्धव ठाकरे यांना सुनावले.

मंत्रिमंडळा विस्ताराच्या पुढच्या टप्प्याबाबत बोलताना रामदास कदम म्हणाले की, मंत्रिमंडळाची संख्या सध्या कॅबिनेटला हवी आहे, तेवढ्या मंत्र्यांची संख्या सध्या तरी आहे. त्यामुळे उर्वरीत विस्तारही पुढच्या पंधरा दिवसांत होईल.