Solapur University : युवासेना, काँग्रेसची बाजी; पण क्रॉस वोटिंगमुळे संभाजी ब्रिगेडचा घात

सोलापूर : पुण्यश्लोक अहिल्यादेवी होळकर सोलापूर (Solapur) विद्यापीठाच्या सिनेट निवडणुकीत (Election) अन्य मतदारसंघ वगळता ‘पदवीधर’मध्ये क्रॉस वोटिंग व बाद झालेल्या मतांचा फटका ‘सुटा’सह अन्य पराभूत उमेदवारांना बसला. युवा सेनेकडून (yuvasena) ॲड. उषा पवार यांनी बाजी मारली, पण संभाजी ब्रिगेडचे उमेदवार सचिन खुळे यांना पराभव स्वीकारावा लागला. या निवडणुकीत विद्यापीठ विकास मंचने सर्वाधिक पाच जागा जिंकत पदवीधर मतदारसंघ काबीज केला आहे. (Solapur University : Yuva Sena, Congress Win; Defeat of Sambhaji Brigade candidate due to cross voting)

सोलापूर विद्यापीठ शिक्षक संघटनेने (सुटा) संभाजी ब्रिगेड व युवा सेनेला प्रत्येकी एक जागा पदवीधरसाठी दिली होती. काँग्रेसचे युवक शहराध्यक्ष गणेश डोंगरे यांनाही उमेदवारी दिली होती. लेबर फेडरेशनचे संचालक शंकर चौगुले यांनीही ‘सुटा’कडूनच उमेदवारी दाखल केली होती. सुरुवातीला काहींनी मिळून, पण निवडणूक जवळ आल्यावर प्रत्येकांनी आपापल्या पातळीवर प्रचार केला. प्रचारावर अधिक भर दिलेल्या उमेदवारांनी आपण विद्यार्थ्यांसाठी काय करणार आहोत, हे सांगितले. पण, मतदान कसे करायचे, हे सांगायला कमी पडले. त्यामुळे ३५० ते ९०१ मते बाद झाली आहेत.

सुमारे साडेआठ हजारांपैकी ४८ टक्केच मतदान झाले होते. त्यातही मतदान मोठ्या प्रमाणावर बाद झाले आणि क्रॉस वोटिंग झाल्याने अनेकांना अनपेक्षित पराभव स्वीकारावा लागल्याचे पहायला मिळाले. सिनेटच्या पदवीधरमधून राजाभाऊ सरवदे, ॲड. निता मंकणी, उषा पवार, यतिराज होनमाने, वर्षाराणी कामुर्ती, चन्नबसप्पा बंकुर, अजिंक्य देशमुख, गणेश डोंगरे, सचिन गायकवाड, अजितकुमार संगवे यांनी विजय मिळवला.

युवा सेनेचा जल्लोष

‘सुटा’कडून उमेदवारी अर्ज दाखल केलेल्या युवासेनेच्या पदाधिकारी उषा पवार यांनी विद्यापीठाच्या सिनेट निवडणुकीत विजय मिळविला. या पार्श्वभूमीवर युवा सेनेतर्फे पार्क चौकातील कार्यालयासमोर शनिवारी (ता. १ आक्टोबर) जल्लोष करण्यात आला. गुलालाची उधळण करून विजयी उमेदवार उषा पवार यांना पेढे भरविण्यात आले. यावेळी घोषणाबाजी करण्यात आली. संभाजी ब्रिगेडचे जिल्हाध्यक्ष सोमनाथ राऊत यांचाही पवार यांच्या विजयात मोठा वाटा राहिला.

गणेश डोंगरेंनी पराभवाचे उट्टे काढले

विद्यापीठाच्या सिनेट निवडणुकीत विजय संपादित केल्याबद्दल युवक काँग्रेसचे सोलापूर शहराध्यक्ष गणेश डोंगरे यांचा शहर काँग्रेसचे अध्यक्ष प्रकाश वाले यांच्या हस्ते सत्कार करण्यात आला. तत्पूर्वी, माजी केंद्रीय गृहमंत्री सुशिलकुमार शिंदे, प्रदेशाध्यक्ष नाना पटोले, युवक काँग्रेसचे प्रदेशाध्यक्ष कुणाल राऊत, आमदार प्रणिती शिंदे यांनी त्यांना शुभेच्छा दिल्या. डोंगरे यांचा २०१७ मध्ये नऊ मतांनी पराभव झाला होता.

यतिराज होनमानेंची सिनेटमध्ये एन्ट्री

पुण्यश्लोक अहिल्यादेवी होळकर सोलापूर विद्यापीठाच्या सिनेट निवडणुकीत यतिराज होनमाने यांनी विद्यापीठ विकास मंचकडून विजय मिळविला. शुक्रवारी (ता. ३०) रात्री उशिरापर्यंत मतमोजणी सुरु होती. टप्प्याटप्याने निकाल हाती येत होते. सर्वांचीच धाकधूक वाढली होती. अशा स्थितीत यतिराज होनमाने यांनी विरोधी उमेदवारांवर मात करीत सिनेटमध्ये एन्ट्री केली.