काँग्रेसला धक्का! एका आमदाराच्या चुकीमुळं राज्यसभेची हातातली जागा गेली

गुवाहाटी : एका आमदाराच्या चुकीमुळे काँग्रेसला राज्यसभेच्या जागेवर पाणी सोडावे लागले आहे. आमदाराने केलेल्या तांत्रिक चुकीमुळे भाजपचा उमेदवार राज्यसभेवर निवडून गेला आहे. काँग्रेस आमदाराने मत वाया घालवल्याने पक्षाला मोठा धक्का बसला आहे. आसाममधून भाजपचे दोन खासदार आता राज्यसभेवर गेले आहेत.

आसाममध्ये (Assam) राज्यसभेच्या (Rajys Sabha) दोन जागांसाठी निवडणूक झाली. यातील एक जागा बिनविरोध झाली तर एका जागेसाठी मतदान झाले. या निवडणुकीत काँग्रेसचे (Congress) आमदार सिद्दीकी अहमद यांनी हा प्रकार केला आहे. काँग्रेसचे उमेदवार रिपुन बोरा यांच्या पराभवास अहमद कारणीभूत ठरले. मतपत्रिकेवर अहमद यांना 1 हा आकडा लिहायचा होता. त्याऐवजी अहमद यांनी ‘one’ असे लिहिले. त्यामुळे त्यांचे मत बाद झाले आणि काँग्रेसच्या बोरा यांचा पराभव झाला.

भाजपचे (BJP) पवित्र मार्गरिटा हे बिनविरोध निवडून आले. दुसऱ्या जागेसाठी भाजप आघाडीकडून युनायटेड पीपल्स पार्टी लिबरल पक्षाचे राँग्वरा नार्झरे हे मैदानात उतरले होते. त्यांच्या विरोधात काँग्रेसने बोरा यांना उतरवले होते. आसाम विधानसभेतील एकूण 126 मतांपैकी 83 मते भाजप आणि सहकारी पक्षांकडे होती. ही मते मार्गरिटा यांना निवडून आणण्यास पुरेशी होती. दुसऱ्या उमेदवाराला निवडून येण्यासाठी 43 मते आवश्यक होती. काँग्रेससह विरोधी पक्षांकडे 44 मते होती. परंतु, अहमद यांनी त्यांचे मत वाया घालवले. यामुळे अखेर बोरा यांचा पराभव झाला आणि भाजपने दुसरी जागाही जिंकली.

भाजपचं संख्याबळ शंभरवर

राज्यसभा निवडणुकीतील दमदार कामगिरीमुळे भाजपचे राज्यसभेतील संख्याबळ आता शंभरवर पोचले आहे. देशात 1988 पासून पहिल्यांदाच असे घडले आहे. काँग्रेसचे राज्यसभेतील संख्याबळ दिवसेंदिवस घटत आहे. यामुळे काँग्रेसचे राज्यसभेतील विरोधी पक्षनेतेपद धोक्यात आले आहे. आगामी गुजरात आणि कर्नाटक विधानसभा निवडणुकीत काँग्रेसने चांगली कामगिरी न केल्यास पक्षाचे विरोधी पक्षनेतेपद जाऊ शकते.