सिद्धूजी, तुमचे मित्र इम्रानभाईंना समजावा : दिग्विजयसिंहांचा घरचा आहेर 

नवी दिल्ली : " सिद्धूजी, तुमचे मित्र इम्रानभाईंना समजावा ,   त्यांच्याच मुळे तुम्हाला शिव्या खाव्या लागत आहेत. 
भारतावर हल्ले करणाऱ्या दहशतवाद्यांवर कारवाई करण्यासही तुमच्या मित्राला सांगा," अशा शब्दात काँग्रेसचे ज्येष्ठ नेते 
दिग्विजयसिंह यांनी नवज्योत सिद्धू  यांना घरचा आहेर दिला आहे . 

पंजाब मंत्रिमंडळात मंत्री असलेल्या नवज्योतसिंग सिद्धू यांनी पुलवामा दहशतवादी हल्ल्याबद्दल  देशभरात पाकिस्तान विरुद्ध जनक्षोभ उसळलेला असताना पाकिस्तानची बाजू घेतली होती . त्या भूमिकेपासून माघार घेण्यास सिद्धू तयार नसल्याने त्यांच्या विरुद्ध  देशभरात टीकेची झोड उठलेली आहे . पंजाबमधील काँग्रेस नेत्यांनी आणि एका मंत्र्यानेही सिद्धू यांची मंत्रिमंडळातून हकालपट्टी करण्याची मागणी केली आहे . 

आता दिग्विजयसिंह यांची त्यात भर पडली आहे . त्यांनी आज काश्मीरबाबत अनेक ट्विट केले आहेत . एका ट्विटमध्ये दिग्विजयसिंह यांनी पाकिस्तानचे पंतप्रधान इमरान खान संदेश पाठवला आहे .

त्यात ते म्हणतात ,"  इम्रान खानजी जरा धाडस दाखवा आणि हाफीज सईद आणि मसूद अझहर या दहशतवाद्याना भारताच्या हवाली करा . तुम्ही असे केले तर पाकिस्तान आर्थिक संकटातून बाहेर पडेल आणि तुमचे  नाव नोबेल शांता पुरस्कारासासाठी आघाडीवर राहील . "