नवी दिल्ली : देशात कोरोनाचा (Covid19) कहर सुरु असून, या परिस्थितीत काही राजकीय पक्ष आणि नेते (Politicians) हे रेमडेसिव्हिरसह (Remdesivir) इतर कोरोना औषधांची (Medicines) साठेबाजी करीत असल्याचे समोर आले आहे. उच्च न्यायालयाने (High Court) याची आज गंभीर दखल घेतली. राजकीय नेत्यांना अशा प्रकारे साठेबाजी (Hoarding) करण्याचा कोणताही अधिकार नसून, त्यांनी तातडीने त्यांच्या ताब्यातील औषधे सरकारकडे सोपवावीत, असे निर्देशही उच्च न्यायालयाने दिले आहेत.
रेमडेसिव्हिरसह अनेक औषधांचा साठा राजकीय नेते करीत असून, त्याचे वाटप ते कार्यकर्त्यांना करीत आहेत. परंतु, रुग्णांना धावाधाव करुनही ही औषधे मिळत नसल्याचे चित्र आहे. याबाबत उच्च न्यायालयात जनहित याचिका दाखल आहे. यावर आज सुनावणी झाली. न्यायालय म्हणाले की, नेत्यांनी ही औषधे राजकीय फायद्यासाठी नव्हे तर सामाजिक कार्य म्हणून खरेदी केल्याचे म्हटले आहे. त्यामुळे त्यांनी ही औषधे तातडीने दिल्ली सरकारच्या आरोग्य सेवा महासंचालकांकडे जमा करावीत. यातून त्यांचा वापर सरकारी रुग्णालयातील गरीब आणि गरजू रुग्णांसाठी होईल.
दिल्ली पोलिसांनी राजकीय नेत्यांकडून होत असलेल्या औषधांच्या साठेबाजीचा तपास करुन त्याचा अहवाल आज न्यायालयासमोर सादर केला. यावर न्यायालयाने नाराजी व्यक्त करीत या तपास अहवालावर ताशेरे ओढले. पोलिसांनी या प्रकरणी योग्य पद्धतीने तपास करुन चांगला तपास अहवाल आठवडाभरात सादर करावा, अशी तंबीही न्यायालयाने दिली.
देशात 24 तासांत कोरोनामुळे 4 हजार 106 मृत्यू
देशात आज सकाळी 8 वाजेपर्यंत मागील 24 तासांत 2 लाख 81 हजार 386 नवीन रुग्ण सापडले असून, 4 हजार 106 जणांचा मृत्यू झाला आहे. देशातील कोरोना रुग्णांची एकूण संख्या आता 2 कोटी 49 लाख 65 हजार 463 झाली असून, कोरोनामुळे मृत्यू झालेल्यांची एकूण संख्या 2 लाख 74 हजार 390 झाली आहे, अशी माहिती केंद्रीय आरोग्य मंत्रालयाने दिली आहे.
Edited by Sanjay Jadhav
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.