मुख्यमंत्र्यांचे "लाड' मुंबई भाजपत शेलारांची जागा घेणार ? 

मुंबई : मुंबई भाजप अध्यक्ष आशिष शेलार यांना महापालिका निवडणुकिअगोदर दुसऱ्या टर्मसाठी संधी देण्यात होती. शिवसेनेविरुद्ध लढून शेलार यांच्या नेतृत्वाखलील भाजपने घवघवीत यश मिळवले, मात्र आता शेलार यांच्या जागी दुसऱ्या नेत्याला संधी देण्याबाबतच्या हालचाली भाजपच्या गोटात सुरु आहेत. मुंबई शहरावर पकड राहावी, यासाठी मुख्यमंत्री देवेंद्र फडणवीस यांच्या "लाड'की व्यक्तीची निवड व्हावी यासाठी चाचपणी केली जात असल्याचे विश्वसनिय सूत्रांकडून समजते. 

शेलार यांची कामगिरी दमदार असलीतरी त्यांच्याजागी दुसरा चेहरा आणण्याच्या हालचाली सुरु आहेत. राष्ट्रवादी कॉंग्रेसमधून भाजपमध्ये आलेले प्रसाद लाड हे सध्या मुख्यमंत्र्यांच्या मर्जीतील मानले जातात. अमित शाह हे मुंबई दौऱ्यावर असताना लाड यांच्यावर महत्वाची जबाबदारी देण्यात आली होती. त्यामुळे राष्ट्रपती निवडणुकीनंतर मुंबई अध्यक्षपदावर दुसऱ्या व्यक्तीची निवड करायची झाल्यास मराठी चेहऱ्याचा अधिक विचार केला जाऊ शकतो.भाजपचे आमदार अतुल भातखळकर आणि पराग अळवणी यांची नांवेही चर्चेत आहेत. भातखळकर आणि अळवणी यांना संघ संस्कार आणि अखिल भारतीय विद्यार्थी परिषदेची नाळ माहीत असल्याने त्यांच्या नावाचा विचार होऊ शकतो. अध्यक्षपदासाठी रस्सीखेच सुरू झाली तर मुंबईचे उपाध्यक्ष वसंत जाधव हे ही स्पर्धेत असू शकतात.