पुन्हा राजेशाही आणा, मग मी दाखवतो : उदयनराजे 

सातारा: बलात्काराच्या घटना दिवसेंदिवस वाढत आहेत. लोकशाही नसती तर बलात्काराला गोळ्या घातल्या असत्या. आता एकच करा, पुन्हा  'राजेशाही' आणा मग मी दाखवतो काय करायचे, असे विधान साताऱ्याचे खासदार उदयनराजे भोसले यांनी केले. 

जिल्हा परिषदेच्या समोर एनआरएचएमच्या कर्मचाऱ्यांचे आंदोलन सुरू आहे. या आंदोलनस्थळी खासदार उदयनराजे भोसले यांनी भेट दिली. यावेळी ते बोलत होते. 

ते म्हणाले, जनतेने निवडून दिलेले सदस्य, लोकप्रतिनिधी तुमचे प्रश्न मार्गी लावत नसतील तर काय उपयोग नाही. आरोग्य विभागात कर्मचारी नसल्याने मशनरी सडून गेल्या आहेत ही वस्तुस्थिती आहे. आज बलात्काराच्या घटना दिवसेंदिवस वाढत आहेत. याला अपवाद तुम्ही मान्य केलेली लोकशाही आहे. लोकशाही नसती तर बलात्काऱ्याला गोळ्या घातल्या असत्या. आता एकच करा, पुन्हा  'राजेशाही' आणा मग मी दाखवतो काय करायचे ते. या वेळी माजी सभापती सुनील काटकर, संदीप शिंदे व कार्यकर्ते उपस्थित होते.