राष्ट्रवादीच्या 'शिवस्वराज्य' यात्रेत सहभागी होणार नाही : उदयनराजे

सातारा : राष्ट्रवादी काँग्रेस पक्षाने काढलेल्या शिवस्वराज्य यात्रेत सहभागी होणार नसल्याचे पक्षाचे खासदार उदयनराजे भोसले यांनी सांगितले.

ही यात्रा जाहीर करताना उदयनराजे हे स्टार प्रचारक असतील, असे राष्ट्रवादीने जाहीर केले होते. मात्र त्यासंबंधी उदयनराजेंची संमती घेतलेली नव्हती. शिवस्वराज्य यात्रा ही शिरूरचे खासदार अमोल कोल्हे यांच्या नेतृत्वाखाली सुरू आहे. त्या यात्रेत उदयनराजेंनी दुय्यम स्थान स्विकारणे शक्य नव्हते. ही यात्रा उदयनराजेंशिवाय सुरू झाली. त्यानंतरच उदयनराजेंशी भाजपने संपर्क वाढवला व ते भाजपच्या वाटेवर आहे. 

आज साताऱ्यात पत्रकारांनी यासंबंधाने उदयनराजेंना विचारले. राष्ट्रवादीची यात्रा साताऱ्यात येत आहे, तुम्ही सहभागी होणार का, या प्रश्नावर त्यांनी मी लई यात्रा बघितल्या आहेत. आमची स्वतःची जत्रा असताना आम्ही कश्याला त्यामध्ये सहभागी व्हायचे, असा प्रश्न त्यांनी केला.