औरंगाबाद ः मराठवाडा पदवीधर मतदार संघाचे महाविकास आघाडीचे उमेदवार सतीश चव्हाण यांच्या प्रचारार्थ शिवसेना पक्षप्रमुख तथा महाराष्ट्राचे मुख्यमंत्री उद्धव ठाकरे उद्या, (ता.२२) रविवारी झुम मिटींग व फेसबुक लाईव्हद्वारे प्रचार सभा घेणार आहेत. शिवसेनेचे जिल्हाप्रमुख आमदार अंबादास दानवे यांनी ही माहिती दिली आहे.
मराठवाडा पदवीधर मतदारसंघाच्या प्रचारात आता मुख्यमंत्री उद्धव ठाकरे देखील उतरले आहेत. महाविकास आघाडीचे उमेदवार सतीश चव्हाण यांच्या प्रचारासाठी शहरासह मराठवाड्यातील शिवसेनेचे लोकप्रतिनिधी, पदाधिकारी व शिवसैनिक जोमाने कामाला लागले असतांनाच उद्या (ता.२२) स्वतः उद्धव ठाकरे हे दुपारी साडेबारा वाजता झुम मिटिंग व फेसबुक लाईव्हच्या माध्यमातून पदवीधर मतदार व महाविकास आघाडीच्या पदाधिकाऱ्यांशी संवाद साधणार आहेत.
या मिटिंग व बैठकीची माहिती आमदार अंबादास दानवे यांनी प्रसिद्धी पत्रकाद्वारे कळवली आहे. ही प्रचार सभा आभासी पद्धतीने होणार असून मराठवाड्यात प्रत्येक जिल्ह्याच्या ठिकाणी ही सभा ऐकली जाणार आहे. शहरातील मध्य, पुर्व, पश्चिमसह शहर व फुलंब्री विभागासाठी अनुक्रमे तापडीया नाट्य मंदिर, निराला बाझार, हॉटेल विंडसर कॅसल सिडको, हॉटेल विट्स रेल्वे स्टेशन येथे सभा ऐकण्याची व्यवस्था करण्यात आली आहे.
शिवसेना काँग्रेस व राष्ट्रवादी काँग्रेसचे पदाधिकारी व पदवीधर मतदार यांनी या सभेस आवर्जून उपस्थित रहावे, असे आवाहन महाविकास आघाडीतील तीन्ही पक्षांच्या वतीने करण्यात आले आहे. शिवसेनेचे सर्व पदाधिकारी, उपजिल्हाप्रमुख, शहरप्रमुख उपशहर प्रमुख, विभाग प्रमुख, उपविभागप्रमुख ,शाखा प्रमुख महिला आघाडी व युवासेनेचे पदाधिकारी व युवासैनिकांना या सभेस मोठ्या संख्येने उपस्थित राहण्याचे आवाहन शिवसेनेच्या वतीने करण्यात आले आहे.
Edited By : Jagdish Pansare
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.