काँग्रेसतर्फे औरंगाबादेत सुभाष झांबड  तर जालन्यात विलास औताडे 

औरंगाबाद : काँग्रेस पक्षातर्फे अखेर औरंगाबाद आणि जालना या दोन लोकसभा मतदारसंघासाठी उमेदवार जाहीर करण्यात आले आहेत . औरंगाबाद लोकसभेसाठी  सुभाष झांबड    तर जालना लोकसभा मतदारसंघासाठी विलास औताडे यांना उमेदवारी जाहीर झाली आहे . 

या दोघांना चार चार टर्म सलग खासदार म्हणून निवडून आलेल्या शिवसेनेचे  चंद्रकांत खैरे आणि भाजपचे प्रदेशाध्यक्ष रावसाहेब दानवे यांचा सामना करावयाचा आहे . 

सुभाष झांबड हे सध्या औरंगाबाद - जालना स्थानिक स्वराज्य संस्था मतदारसंघाचे आमदार असून त्यांची विधान परिषद सदस्यत्वाची  मुदत चालू वर्षात  ऑगस्ट महिन्यात संपते .  सुभाष झांबड  औरंगाबाद जिल्हा काँग्रेस कमिटीचे अध्यक्ष अब्दुल सत्तार  यांच्या अतिशय जवळचे सहकारी आहेत . आणि अब्दुल सत्तार हे अशोक चव्हाण यांचे  अतिशय विश्वासातील अनुयायी आहेत . त्यामुळे सुभाष झांबड यांना उमेदवारीच्या शर्यतीत कल्याण काळे आणि प्रा. बनसोड यांच्यावर मात करता आली आहे . 

सुभाष झांबड  हे मूळचे वैजापूर तालुक्यातील असून औरंगाबाद शहरात त्यांचा मोठा व्यापार आणि व्यवसाय आहे . एका अर्बन बँकेचा कारभारही ते पाहतात . मात्र ग्रामीण भागातील कार्यकर्त्यांशी त्यांना आता  संपर्क वाढवावा लागेल . शिवाय  वंचित आघाडीचे मोठे आव्हान  त्यांच्यासमोर राहील  . सुभाष झांबड यांनी दहा वर्षांपूर्वी राष्ट्रवादी काँग्रेस पक्षातर्फे औरंगाबाद पूर्व विधानसभा निवडणूक लढविली होती . पण त्यांना यश मिळाले नव्हते . 

जालना लोकसभा मतदारसंघात काँग्रेस पक्षाकडे स्थानिक प्रबळ उमेदवार नव्हता . काँग्रेस नेते  शिवसेनेचे मंत्री अर्जुन खोतकर रावसाहेब दानवे यांच्याविरुद्ध लढण्यासाठी नक्की काँग्रेस पक्षात येतील या समजुतीने बेसावध राहिले . अखेर दानवे आणि खोतकर जोडीने काँग्रेसला तोंडघाशी पाडले .जालना जिल्ह्यातून काँग्रेसचे कैलास गोरंट्याल किंवा अन्य नेते उमेदवारीसाठी इच्छुक नव्हते .  त्यामुळे काँग्रेसला पुन्हा विलास औताडे यांच्याकडे धाव घ्यावी लागली आहे .

 विलास औताडे हे २०१४ मध्येही काँग्रेसचे जालन्याचे उमेदवार होते . पण तेंव्हा मोदी लाट होती आणि मोदींची जालन्यात मोठी सभाही झाली होती .त्यामुळे विलास औताडेंचा पराभव झाला होता .  विलास औताडे हे ज्येष्ठ नेते केशवराव औताडे यांचे चिरंजीव आहेत . केशवराव औताडे हे प्रदीर्घकाळ औरंगाबाद जिल्हा काँग्रेसचे  अध्यक्ष होते . माजी आमदार होते आणि शंकरराव चव्हाण यांचे  ते निष्ठावंत अनुयायी होते .

 महाराष्ट्र काँग्रेस सेवादलाचे अध्यक्षपद विलास औताडेंनी  भूषविलेले आहे . विलास औताडे तीन चार महिन्यापासूनच तयारीला लागलेले असून त्यांनी मतदारसंघातील अनेक मोठ्या गावांचे दौरे केलेले आहेत . जालना लोकसभा मतदार संघात औरंगाबाद जिल्ह्यातील सिल्लोड, फुलंब्री आणि पैठण विधानसभा मतदारसंघांचा समावेश आहे . औताडे यांचे फुलंब्री मतदारसंघात काम आहे आणि संपर्कही आहे . अब्दुल सत्तर यांच्यामुळे औताडेंना सिल्लोड मतदारसंघातही मदत होऊ शकते . 

दोन्ही जिल्ह्यातील काँग्रेसचे अन्य नेते फक्त जाहीर सभांमध्ये व्यासपीठावर  आणि विमानतळावर दिसणार की मनापासून उमेदवारांचे काम करतात यावर बरेच काही अवलंबून आहे .