Champai Soren: चंपई सोरेन यांचा भाजप प्रवेशाचा सस्पेंस संपला; शहांच्या भेटीनंतर आसामच्या मुख्यमंत्र्यांनी सांगितली तारीख

Maharashtra Politics: झारखंडचे माजी मुख्यमंत्री चंपई सोरेन (champai soren) यांचा भाजप प्रवेशाबाबतचा सस्पेंस संपला आहे. भाजपमध्ये प्रवेश करण्याची त्यांची तारीख ठरली आहे. काही दिवसांपूर्वीच चंपई सोरेन यांनी नवा पक्ष स्थापन करणार असल्याची घोषणा केली होती. पण आता नवा पक्ष स्थापन न करता ते भाजपमध्ये प्रवेश करून पुढची निवडणुक लढवणार आहेत, अशी माहिती आसामचे मुख्यमंत्री हेमंत बिस्मा सरमा यांनी दिली आहे.

केंद्रीय गृहमंत्री अमित शाह यांची सोरेन यांनी सोमवारी भेट घेतली. बैठकीत 30 ऑगस्ट रोजी रांची येथे चंपई सोरेन भाजपमध्ये प्रवेश करणार असल्याचे ठरले आहे. हेमंत बिस्मा सरमा या बैठकीस उपस्थित होते. त्याचा फोटो त्यांनी समाजमाध्यमांवर शेअर केला आहे.

चंपई सोरेन यांच्या भाजप प्रवेशामुळे झारखंडमध्ये नवी राजकीय समीकरणे तयार होताना दिसत आहेत. चंपाई सोरेनच्या माध्यमातून भाजपचा आदिवासी व्होटबँकेवर डोळा असल्याचे दिसते. चंपाई सोरेन यांच्यामुळेच झारखंड मुक्ती मोर्चा पुढे सरसावला आहे.

झारखंड मुक्ती मोर्चाला विधानसभा निवडणुकीत फटका बसू शकतो. पक्षाने चंपाई यांना मुख्यमंत्रीपदी ठेवायला हवे होते. भविष्यात ते जे काही पाऊल उचलतील त्याला आम्ही पाठिंबा देऊ असे काही आदिवासी नेत्यांचे म्हणणे आहे.

"चंपाईवर अन्याय झाला आहे. त्याचा अपमान करण्यात आला. त्यांना मुख्यमंत्रिपदावरून जबरदस्तीने हटवण्यात आले," असे आदिवासींचे म्हणणं आहे. हेमंत सोरेन हे जेलमध्ये गेल्यानंतर चंपई सोरेन यांनी मुख्यमंत्री आणि पक्षाची धुरा सांभाळली होती. हेमंत सोरेन जेलमधून बाहेर येताच त्यांना राजीनामा द्यावा लागला. ते नवीन पक्ष स्थापन करणार असल्याची माहिती होती.