धक्कादायक : सरपंचपदाची निवडणूक हरला अन् थेट गावातले रस्ते खोदले, पथदिवे काढले!

भुवनेश्वर : कोणत्याही निवडणुकीतील (Election) पराभव अनेकदा उमेदवारांच्या चांगलाच जिव्हारी लागतो. त्यातून मग दोन गटांमध्ये वाद, हाणामारी अशा घटना घडतात. मतदारांना धमकावण्याचे प्रकार घडतात. पण सरपंचपदाची निवडणूक हरल्यानं संतापलेल्या उमेदवारानं थेट गावातील रस्त्तेच खोदल्याची घटना समोर आली आहे. त्याने गावातील पथदिवेही हटवत आपला राग व्यक्त केला.

ओडिशामधील (Odisha) गजपती जिल्ह्यातील रायगड भागात हा प्रकार घडला आहे. सरपंचपदाच्या (Sarpanch) २० फेब्रुवारी रोजी गंगाबडा गावची निवडणूक झाली होती. या निवडणुकीच्या सोमवारी जाहीर झालेल्या निकालात हरीबंधू करजी यांनी बारीक सबर यांचा १९६ मतांनी पराभव केला. करजी हे दुसऱ्यांदा ही निवडणूक जिंकले आहेत. मतदारांना मतदान करता येऊ नये, म्हणून सबर यांच्याकडून आधीही अनेक कुरापती करण्यात आल्याचा आरोप करजी यांनी केला आहे.

करजी यांच्यासह इतर काही गावकऱ्यांनी मिळून सबर यांच्याविरोधात पोलीस ठाणअयात तक्रार दाखल केली आहे. निवडणुकीत पराभव झाल्यानंतर सबर यांनी निराशेतून समर्थकांना सोबत घेत रस्ते खोदले आहेत. तर काही रस्त्यांवर मोठे दगड टाकून वाहतूकीसाठी बंद केले. सोमवारी त्यांनी पथदिवेही काढल्याचा दावा गावकऱ्यांनी केला आहे. त्यामुळे नागरिकांना मोठा त्रास सहन करावा लागला.

सबर यांच्यावर कडक कारवाई करण्याची मागणी गावकऱ्यांनी केली आहे. गजापती जिल्ह्याचे अतिरिक्त जिल्हाधिकारी संग्राम पंडा यांनी दिलेल्या माहितीनुसार, स्थानिक तहसीलदार आणि पोलिसांनी गावाला भेट दिली असून गावातील रस्ते दुरूस्त केले आहेत. हे रस्ते आता वाहतूकीसाठी खुले करण्यात आले आहेत. दरम्यान, हे गाव आंध्र प्रदेशाच्या सीमेवरील २४ गावांपैकी एक असून जवळपास १५०० मतदार आहेत.