पंतप्रधान मोदींच्या कथनी अन् करणीत फरक; बिल्कीस बानो प्रकरणावरून काँग्रेसचा घणाघात

नवी दिल्ली : बिल्कीस बानो प्रकरणातील दोषींची सुटका करण्यात आल्याच्या पार्श्वभूमीवर विरोधी पक्ष काँग्रेसने भाजपवर (BJP) निशाणा साधला आहे. 'अवघा देश हा पंतप्रधान मोदींच्या (Narendra Modi) कथनी आणि करणीमधील फरक पाहतो आहे,' असा टोला काँग्रेस (Congress) नेते राहुल गांधी (Rahul Gandhi) यांनी लगावला. पंतप्रधान मोदी आणि गृहमंत्री अमित शहा यांच्या संमतीशिवाय दोषींची सुटका होणे शक्य आहे का? असा सवालही काँग्रेसकडून करण्यात आला. (Rahul Gandhi, PM Narendra Modi Latest News)

काँग्रेसच्या सरचिटणीस प्रियांका गांधी यांनी थेट पंतप्रधान मोदींवर निशाणा साधला. "सध्या देशभरातील तमाम महिला एकच सवाल करत आहेत, आमच्यासाठीचा आदर फक्त आता भाषणांपुरताच मर्यादित राहिला आहे काय?" असे त्या विचारत असल्याचे प्रियांका यांनी नमूद केले. राहुल गांधी यांनी हिंदीमध्ये केलेल्या ट्विटमध्ये म्हटले आहे की, "ज्यांनी पाच महिन्यांच्या गर्भवती महिलेवर बलात्कार करत तिच्या तीन वर्षांच्या मुलीला जीवे मारले. त्या नराधमांची स्वातंत्र्याचा अमृत महोत्सव साजरा होत असतानाचा सुटका करण्यात आली. या सगळ्यातून देशातील महिलांना नेमका काय संदेश दिला जात आहे? पंतप्रधान मोदी बोलतात एक करतात दुसरेच, अशी टीका केली.

प्रियांका गांधी यांनी बिल्कीस बानोच्या गुन्हेगारांना तुरुंगातून सोडण्याच्या निर्णयाचा कठोर शब्दांत निषेध केला आहे. "एखाद्या महिलेवर सामूहिक बलात्कार करून तिच्या मुलीला ठार मारणाऱ्यांची भाजप सरकार सुटका करत असेल आणि त्या नराधमांचे कॅमेऱ्यासमोर स्वागत होत असेल तर ही अन्याय आणि असंवेदनशीलतेची परिसीमा नाही काय? मोदी हे महिलांचा आदर फक्त भाषणांमध्येच करतात काय?, असा सवाल महिला करत आहेत, असे प्रियांका यांनी म्हटले आहे.

दरम्यान, ही अत्यंत लाजीरवाणी बाब आहे, पंतप्रधान आणि केंद्रीय गृहमंत्र्यांची मान्यता आणि संमतीशिवाय गुजरात सरकारने त्यांची सुटका केली असे वाटते का?, अशा शब्दात काँग्रेस सरचिटणीस जयराम रमेश यांनीही टीका केली आहे.