Threats To Court judge : अबब! थेट हायकोर्टाच्या सहा न्यायाधीशांना उडवण्याची धमकी; 'खंडणी दिली नाही तर...'

Karnataka News : कर्नाटक राज्य उच्च न्यायालयाच्या (Karnatka High Court) सहा न्यायाधीशाना जीवे मारण्याची धमकी देण्याची धक्कादायक बाब आता समोर आली आहे. न्यायालय जनसंपर्क अधिकारी (PRO) यांच्या मोबाईल फोनवर व्हाईल कॉलद्वारे ही धमकी देण्यात आली आहे. इतकेच नाही तर धमकीचा संदेश व्हॉट्अॅपवरही पाठवण्यात आला आहे. न्यायाधीशांनाच देण्यात आलेल्या या संदेशामुळे एकच खळबळ उडाली आहे. यानंतर आता धमकी देणाऱ्यांचा शोध घेण्यात येत आहे . (Latest Marathi News)

कर्नाटक उच्च न्यायालयाचे जनसंपर्क अधिकारी मुरलीधर यांनी याबाबत तक्रार केली आहे, त्यानुसार १२ जुलै या दिवशी सायंकाळी सात वाजण्याच्या सुमारास एका अज्ञात इसमाने फोन करून धमकी दिली आहे. न्यायालयाच्या व्हॉट्सअॅप क्रमाकारवरही धमकीच्या आशयाचा संदेशही पाठवण्यात आला. या धमकीमध्ये आरोपीने पाकीस्तानातील एबीएल बँकेचा (अलाईड बँक लिमिटेड) खात्यावर ५० लाख रूपये जमा करण्याची धमकी देण्यात आली.

५० लाख रूपये न दिल्यास उच्च न्यायालयाच्या सहा न्यायाधीशांना ठार मारण्यात येईल, अशी धमकी व्हॉट्सअॅपच्या संदेशात धमकी देण्याऱ्याने नमूद केले आहे. ठार मारण्याची धमकी मिळालेल्या या सहा न्यायाधीशांमध्ये मोहम्मद नवाज, एचटी नरेंद्र प्रसाद, अशोक निजगन्नानवर, एचपी संदेश, के नटराजन आणि वीरप्पा यांचा समावेश आहे.

तीन भाषांमध्ये धमकी :

अज्ञात आरोपीने या धमकीचा संदेश तीन भाषांमध्ये पाठवला आहे. हिंदी, उर्दू आणि इंग्रजी भाषेत हा संदेश जनसंपर्क अधिकाऱ्यांच्या नंबरवर आला. या धमकीबरोबरच आरोपीने काही मोबाईल नंबरही व्हॉट्सअॅपवर पाठवले, असे मुरलीधर यांच्या तक्रारीत नमूद आहे. हे नंबर आमच्या शूटरचे आहेत, असा दावा त्यात करण्यात आला आहे. 'इंडिया टुडे'नं याबाबतचं वृत्त दिलं होतं.