Mamata Banerjee on Loksabha : भाजपने डिसेंबरमध्येच लोकसभा निवडणुका घेतल्या तर..; ममता बॅनर्जींचे सूचक विधान

Mamata Banerjee On Lok Sabha Elections : भारतीय जनता पक्षाने देशभरात आगामी लोकसभेची तयारी सुरू केली असताना पश्चिम बंगालच्या मुख्यमंत्री ममता बॅनर्जी यांनी सूचक विधान केलं आहे. 'लोकसभेच्या निवडणुका डिसेंबरमध्येच झाल्या तर आश्चर्य वाटायला नको,' असं सूचक विधान ममता बॅनर्जी यांनी केलं आहे.

ममता बॅनर्जींपूर्वी बिहारचे मुख्यमंत्री नितीश कुमार आणि तामिळनाडूचे मुख्यमंत्री एम.के. स्टॅलिन यांनीही मुदतपूर्व लोकसभा निवडणुकीची शक्यता व्यक्त केली होती. त्यामुळे पुन्हा एकदा राजकीय वर्तुळात चर्चांना उधाण आले आहे.

दरम्यान, पश्चिम बंगालचे राज्यपाल सी.व्ही. आनंद बोस यांच्यावरही मुख्यमंत्री बॅनर्जी यांनी निशाणा साधला होता. राज्यपाल घटनात्मक नियमांचे उल्लंघन करत आहेत, असा दावा करत मी या पदाचा आदर करते, पण त्यांच्या असंवैधानिक कारवायांचे समर्थन करत नाही. अशी टीकाही त्यांनी केली होती.

धक्कादायक बाब म्हणजे, भाजपने लोकसभा निवडणुकीच्या प्रचारासाठी सर्व हेलिकॉप्टर आधीच बुक केले आहेत. इतर राजकीय पक्षांनी प्रचारासाठी त्यांचा वापर करू नये म्हणून हे हेलिकॉप्टर बुक करण्यात आल्याचे सांगण्यात येत आहे.

तसेच, मधील सीपीआय(एम) ची सत्ता आम्ही संपवली. आता लोकसभा निवडणुकीत भाजपचा पराभव करू. भाजपने आपल्या देशात समाजिक कटुता निर्माण केली आहे. ते पुन्हा सत्तेत आले तर आपला देश द्वेषाचा देश बनवेल, अशी शंकाही त्यांनी व्यक्त केली आहे.

दरम्यान, कोलकाता जवळील बेकायदेशीर फटाका कारखान्यात झालेल्या स्फोटाच्या प्रकरणावर मुख्यमंत्री ममता बॅनर्जी म्हणाल्या, काही लोक काही पोलिसांच्या मदतीने बेकायदेशीर कामात गुंतले होते. पश्चिम बंगालमधील दत्तपुकुर येथे रविवारी एका बेकायदेशीर फटाक्यांच्या कारखान्यात स्फोट झाला होता. ज्यामध्ये नऊ जणांचा मृत्यू झाल्याचे सांगितले.

तसेच, त्यांनी अखिल भारतीय विद्यार्थी परिषद आणि जादवपूर विद्यापीठात ‘गोळी मारा’चा नारा देणाऱ्यांना, हे यूपी नाही, जाधवपूर विद्यापीठात ‘गोळी मारा’च्या घोषणा देणाऱ्यांना अटक केली जाईल, असा इशाराही बॅनर्जी यांनी दिला आहे.

Edited By- Anuradha Dhawade