नवाब मलिकांच्या विरोधात दिल्लीकर रस्त्यावर, पोस्टरबाजी करून वानखेडेंना पाठिंबा

नवी दिल्ली : एनसीबीचे विभागीय संचालक समीर वानखेडे (Samir Wankhede) यांच्यावर सातत्याने नव-नवीन आरोप होत आहेत. राष्ट्रवादीचे नेते आणि राज्याचे अल्पसंख्यांक मंत्री नवाब मलिक (Nawab Malik) हे समीर वानखेडे यांच्याबाबत सातत्याने वेगवेगळे दावे करुन खळबळ उडवून देत आहेत. मात्र सध्या याच मुद्दावरुन आता लोक आणि विविध संघटना देखील रस्त्यावर उतरण्यास सुरुवात झाली आहे. सध्या समीर वानखेडेंच्या समर्थनार्थ आणि नवाब मलिकांच्या विरोधात दिल्लीकर देखील रस्त्यावर उतरले आहेत. आकेपुरम परिसरातील एनसीबीच्या मुख्यालय समोर येऊन पोस्टर्स झळकवून त्यांनी वानखेडेंच्या पाठीशी उभे असल्याचे सांगितले आहे.

या पोस्टर्सवर Say No Drugs असे म्हणत ड्रग्ज रॅकेटचा बीमोड करण्याची मागणी करण्यात आली आहे. यात सुशांतसिंग राजपुतचे देखील फोटो दिसून येत आहेत. तसेच हिंदू सेनेने ही दिल्‍लीत एनसीबीच्या मुख्यालय समोर पोस्टर्स झळकवत समीर वानखेडेंना पाठिंबा दिला आहे.

प्रभाकरने साईलचे आरोप आणि समीर वानखेडेंची धावपळ

किरण गोसावीचा बॉडीगार्ड प्रभाकर साईलने (Prabhakar Saeel) एका व्हिडीओमध्ये म्हटले आहे की, आर्यनला ताब्यात घेतेल त्या रात्री आम्ही एनसीबीच्या कार्यालयाकडून लोअर परेलच्या दिशेने गेलो. तिथे एका पुलाखाली आमची गाडी थांबली. आमच्यामागे निळ्या रंगाची मर्सिडीज थांबली. त्या गाडीत एसआरकेची मॅनेजर होती. त्यानंतर गोसावी व सॅम सोबत त्यांची मिटींग झाली. त्यामध्ये काय झाले ते त्यावेळी मला कळलं नाही. पण गाडीतून त्यांनी परत फोन केला. 25 चा बाँड टाक, लास्ट 18 ला कर. कारण 8 समीर वानखेडेंना जाणार आहेत. आणि 10 आपल्याला वाटून घ्यायचे आहेत, असं ठरल्याचं प्रभाकर याने म्हटलं आहे. हे आकडे कोटींमध्ये असल्याची चर्चा आहे.

प्रभाकर साईलच्या आरोपांनंतर समीर वानखेडे यांनी मुंबई पोलीस आयुक्तांना पत्र लिहीत आपल्यावर कोणतीही कारवाई न करण्याची विनंती केली आहे. त्यानंतर एनडीपीएस न्यायालयातही प्रतिज्ञापत्र सादर केले आहे. सोमवारी रात्री त्यांनी दिल्लीही गाठली. एनसीबीच्या दक्षता समितीकडून त्यांची चौकशी केली जाणार आहे.